Praiminisitra Omer Beriziky

17/10/2012

Tokony himasoana bebe kokoa ny firosoana amin’ny fanatanterahana ny fifidianana. Izay no nambaran’ny Praiminisitra lehiben’ny Governemanta, Omer Beriziky, raha nitafa tamin’ny mpanao gazety ny tenany omaly, taorian’ny fanpkafana ny fotoam-pivoriana ara-potoanan’ny Kongresin’ny tetezamita. Nambarany ihany koa fa tokony handray ny andraikiny avokoa ny isan’isany avy, indrindra ireo voakasika mivantana amin’ny fanatomombanana ny fifidianana izay hatao eto amin’ny firenena. Tokony hanampy ny CENIT ihany koa ny rehetra hoy ihany ny Praiminisitra.

Momba ny fanomezana ny anjaran’ny fitondram-panjakana amin’ny vola fampandehanana ny raharaham-pifidianana, nilaza ny efa manao izay ho afany ny governemanta mba ahavitana izany. Efa nisy ny ampahany efa nomena, hoy izy ary mbola hisy ihany koa ny manaraka. Marihana fa mitentina 71 tapitrisa dolara ny vola anjaran’ny fanjakana Malagasy amin’ny fampandehanana ny fifidianana. Miankina amin’ny fanatanterahan’ny fitondrana an’izany no hanomezan’ny mpamatsy vola ny anjarany, raha araka ny efa nambaran’ny masoivohon’ny Vondrona Eropeana eto Madagasikara.
Filohan’ny CST
“Atsaharo ny resaka ankolafy”
Naneho ny heviny momba ny zava-misy amin’izao fotoana izao mahakasika ny famahana ny krizy ny Filohan’ny Filankevitra avon’ny Tetezamita Rasolosoa Dolin. Nambarany fa tokony hampitoviana ny fijerin’ny mpanao politika eto amintsika raha tiana ny hivoahana amin’izao krizy izao. Ho fampiharana an’izany dia tokony hialana amin’izany ny fametrahana ireo ankolafy amin’ny fomba fifampiresahana.
Marihina fa omaly tolakandro no nisokatra tamin’ny fomba ofisialy ny fivoriana ara-potoanan’ny Filankevitra Avon’ny Tetezamita. Fivoriana izay haharitra roa volana ary handinihina ny tetibolam-panjakana amin’ny taona 2013.

Mompera Alain Thierry Raharison
“Miha-tany tsy tan-dàlana isika”
Miendrika fampielezan-kevitra mialoha ny fotoana ireo hetsika ataon’ny fitondrana Tetezamita amin’izao fotoana izao, toy ny fitokanana zava-bita sy ny fanomezana fampanantenana maro dia maro ary ny fitetezam-paritra isan’andro isan’andro, raha araka ny nambaran’ny Sekretera jeneralin’ny fikambanana Justice et Paix. Mazava loatra fa halatra ny fanaovana fampielezan-kevitra mialoha ny fotoana, ka tokony handray andraikitra amin’izany ny isan’isany avy, hoy ihany ity mpitondra fivavahana ao amin’ny Eglizy Katolika ity.


Maneho ny ahiahin’izy ireo amin’ny mety tsy ahatomombanan’ny fandrafetana ny lisim-pifidianana ny vondron’ny fiarahamonim-pirenena. Nambaran’izy ireo tamin’izany fa maro ireo antony izay mety tsy maha azo antoka ny lisim-pifidianana izay harafitra ka hampiasaina amin’ity fifidianana ho avy ity. Isan’izany ny tsy nandraisan’ny CENIT ny lisim-pifidianana efa narafitra nandritra ny fifidianana natao farany teo. Lisim-pifidianana izay efa nandaniam-bola kanefa dia tsy ilaina indray, hoy ihany izy ireo. Ankoatr’izay dia tokony ho jerena akaiky ihany ny momba ireo olona izay tsy manana fonenana raikitra, satria maro izy ireo amin’izao fotoana izao eto Madagasikara.
Marihina fa misy ny atrik’asa momba ny andraikitry ny fiarahamonim-pirenena manoloana ny fifidianana izay natomboka omaly eto Antananarivo.

Hatreto dia mbola tsy misy ny firesahana ny daty marina ny amin’ny fiverenan’ny filoha teo aloha Ravalomanana Marc eto an-tanindrazana. Izay no nambaran’ny mpitarika ny ankolafy Ravalomanana, Rakotoarivelo Mamy, raha nanontaniana mikasika ny datin’ny 18 oktobra ny tenany. Nilaza ihany koa ity mpanao politika ity fa hifampidinika amin’ireo iraky ny SADC izay mivahiny eto Madagasikara hatramin’ny faran’ny herinandro teo izy ireo. Mahatoky ny hisian’ny vahaolana avy amin’ny fiaraha-midiniky ny foloalindahy Malagasy sy ireo iraka miaramila avy amin’ny SADC ihany koa ny ankolafy Ravalomanana, hoy i Rakotoarivelo Mamy. Nomarihiny fa efa nisy ny fangatahan’ny iraky ny SADC fihaonana tamin’ny ankolafy Ravalomanana saingy nohon’ny fahateren’ny fotoana dia mbola tsy raikitra izany fihaonana izany.