Tsy eken’ny mpivarotra ao Bazarikely

12/10/2012

Mitaky ny hamindrana ny fanerenana ny Bazarikely any Toamasina ho amin’ny fotoana hafa ny mpivarotra ao amin’ity tsena kasain’’ny fitondrana tetezamita hasiam-panamboarana ity. Nambaran’ireo mpivarotra fa leon’ny fampanantenana poak’aty nataon’ny fitondrana tetezamita izy ireo. Tsy ankasitrahan’izy ireo ihany koa ny hanaovana fanararaotana ara-politika ity tetik’asa ity amin’izao ankatoky ny fifidianana izao. Nirotsaka an-dalambe noho izany ny mpivarotra tao Bazarikely Toamasina.

Mitaky ny hamindrana ny fanerenana ny Bazarikely any Toamasina ho amin’ny fotoana hafa ny mpivarotra ao amin’ity tsena kasain’’ny fitondrana tetezamita hasiam-panamboarana ity. Nambaran’ireo mpivarotra fa leon’ny fampanantenana poak’aty nataon’ny fitondrana tetezamita izy ireo. Tsy ankasitrahan’izy ireo ihany koa ny hanaovana fanararaotana ara-politika ity tetik’asa ity amin’izao ankatoky ny fifidianana izao. Nirotsaka an-dalambe noho izany ny mpivarotra tao Bazarikely Toamasina.

Tsy manaiky hatao fitaovana intsony ireo mpivarotra any amin’ny Bazarikely any Toamasina. Nanao hetsika ho fanoherana ny fanatanterahana ny tetik’asan’ny filohan’ny Tetezamita izay mitetika ny hanarina an’ity Bazary ity amin’izao fotoana ankatoky ny fifidianana izao. Mitaky ny tsy hanaovana ity fanarenana ity raha tsy aorian’ny fahavitan’ny fifidianana arak’izany ireo mpivarotra mivondrona ao Bazarikely Toamasina. Isan’ny anton’izao fihetsiketsehan’ny mpivarotra tao amin’ny Bazarikely Toamasina izao ihany koa ny maha vanim-potoana mahabe fahasahiranana ny vahoaka an’izao fotoana izao. Izany hoe raha misy ny fanesorana azy ireo ao amin’ny tsena amin’izao fotoana izao nohon’ny fanarenana tsy maintsy hatao dia hitrongy vao homana ireo mpivarotra satria tsy hanana fidiram-bola amin’izao fotam-pahavaratra hiditra izao. Marihana hoy izy ireo fa nohon’ny fidiran’ny mpianatra dia mandeha aloha amin’izao fotoana izao ny varotra ataon’izy ireo. Ankoatr’izay ho avy ihany koa ny fetin’ny maty sy ny fihotazana ny vokatra “letchis” izay mampidi-bola ho azy ireo ihany koa.
Ankoatr’izay dia manahy ny hitarazoan’ny asa fanarenana ihany koa ireto mpivarotra ao amin’ny Bazarikely ireto. Tsy sambany no nisy fampanantenana nataon’ny filohan’ny Tetezamita ho an’ny tananan’i Toamasina, hoy ny fanambaran’izy ireo. Iaraha-mahita anefa fa tsy misy tanteraka avokoa ny ankamaroan’ireny na farafaharatsiny mitarozaka izay tsy izy ny fanatanteraha azy. Noraisin’izy ireo ho ohatra tamin’izany ny fanamboarana ny lapan'ny tanana izany nitarazoka ela be, ny stadium Barikadimy izay tsy mbola nikitihina mihitsy hatramin’izao nefa nampanantenaina fa hamboarina ao anatin’ny fotoana fohy. Noresahan’ny mpanao fihetsiketsehana ihany koa ny momba ny lalana rue de Commerce Ampasimazava, Bd Ratsimilaho nambaran’i Andry Rajoelina fa hatao “synthetique” kanefa ronono an-tavy fotsiny ihany hatramin’izao satria tsy nisy na dia fanadihadiana aza.
Fanararaotana politika
Marihana fa tsy ireto mpivarotra izay nanao fihetsiketsehana omaly tany Toamasina ireto ihany no tsy faly amin’ity tetik’asan-dRajoelina ity fa efa naneho ny tsy fankasitrahana izany ihany koa ireo olom-boatendry avy any amin’izany faritra izany toa ny CST Ratsiraka Rolland izay nilaza mazava fa mangalatra ny tetik’asa efa nisy hatrizay ny filohan’ny tetezamita.
Marihana fa vola avy amin’ny tetikasa Ambatovy sy ny SPAT no entina hanaovana ireo asa fanarenana ireo. Araka ny nambaran’ny Filohan’ny delegasiona manokana any Toamasina Toalina Zafindrabary, dia mbola ao anatin’ny fanadihadiana amin’izao fotoana izao ity asa ity. “Bureau d’étude”, hoy izy no hanao izany fanadihadiana izany ary aorian’izao va hiroso amin’ny fanampahan-kevitra. Tsy maintsy alaina ny hevitr’ireo mpivarotra rehefa tonga izay fotoana handraisana ny fanampahan-kevitra izay hoy ihany ity olom-boatendry ity. Nanamafy anefa ity filohan’ny delegasiona manokan’ny Toamasina ity fa amin’izao fotoanan’ny maintany izao no tsara hanatontosana ny asa raha tiana ny hialan’ny mpivarotra sy ny mpividy ao amin’io tsena io amin’ny fasahiranana manjo azy ireo isaky ny fotoam-pahavaratra. Nambarany fa azo kilasiana ho isan’ny asa maika sy mahakasina mivantana any fiainam-bahoaka ity fanarenana ny tsenan’ny Bazarikely any Toamasina ity ka tsy tokony andrasana amin’ny fotoana hafa.
Tsar any mampatsiahy fa nandritra ny fitsidihana nataon’ny filohan’ny Tetezamita sy ireo mpiara-miasa akaiky aminy tany Toamasina ny faran’ny herinandro teo no nanambarany ny hanarenana izany Bazarikely any an-toerana izany.