Hiakatra 400 ariary ny sara-pitaterana

17/10/2012

Tsy mankasitraka ny fampakarana ny saram-pitaterana an-drenivohitra izay efa narangarangan’ny Vondron’ny mpitatitra ny mpanjifa. Nambaran’ny filohan’ny Tambajotram-pirenen’ny mpanjifa, Rakotorova Rabetsara Lita fa hitaky ny fandraisan’nandraikitry ny governemanta manoloana izao fanampahan-kevitry ny mpitatitra izao izy ireo, amin’ny alalan’ny hetsika izay hatao mialoha ny datin’ny 1 novambra. Nomarihany ihany koa fa tsy nisy fifampidinihana tamin’ny mpanjifa ny fandraisana fanampahan-kevitra nataon’ny mpitatitra. Etsy an-danin’izany, araka ny voalazan’ny Vondron’ny

mpitatitra dia tsy hihemotra amin’io fanampahan-kevitra io izy ireo raha tsy misy ny vahaolana avy amin’ny fitondram-panjakana manoloana ny fatiantoka manjo azy ireo taorian’ny fiakaran’ny vidin-tsolika. Inoana fa tsy nohon’ny maha fetin’ny maty ny andron’ny 1 novembra no nahatonga ireo mpitatitra amin’ny zotram-pitaterana an-drenivohitra, mivondrona ao amin’ny UCTU, hampakatra ho 400 ariary ny saram-pitaterana an-drenivohitra. Satria raha izany dia tsy ampihambahambana ny milaza fa tena hamono ny mpanjifa tokoa ireo mpitatitra. Raha ny fiainam-bahoaka amin’izao fotoana izao manko no jerena dia iaraha-mahalala fa tsy ahatakatra an’io saran-dalana io ny ankamaroany. Na izany na tsy izany dia fantatra izany amin’izao fotoana izao fa dia tapa-kevitra ny hampiantra an’io saran-dàlana vaovao io, manomboka amin’ny 1 novembra ho avy izao ireo mpitatitra ao amin’ny Vondron’ny mpitatitra amin’ny zotra an-drenivohitra na ny UCTU. Saika nahitana ny taratasy manambara izany fiakaran’ny saram-pitaterana izany avokoa ny taxi-be mpikambana ao amin’ny UCTU nanomboka omaly. Nanamafy ny fisian’izay fandraisana fanampahan-kevitra hampakarana ny sara-pitaterana izay ihany koa ny filohan’ny UCTU sady filohan’ny federasion’ny mpitatitra an-drenivohitra sy manodidina ny renivohitra, Andriambinintsoanolomora Bernardin. Nambarany fa fanampahan-kevitra niraisan’ny mpitatitra manontolo eto an-drenivohitra io, ary efa nifampiresahana tamin’ny mpitondra fanjakana.
Antony maro no nambaran’ity filohan’ny UCTU ity ka nahatonga azy ireo handray izao fanampahan-kevitra izao. Voalohany amin’izany ny fisian’ny fatiantoka mahazo ny mpitatitra nohon’ny tsy fifanaranan’ny vidin-tsolika amin’ny saran-dàlana. Efa tamin’ny taona 2004, hoy izy, no namatrahana ho 300 ariary ny sara-pitaterana eto an-drenivohitra. Tamin’izany fotoana izany dia mbola 1680 ariary ny litatra amin’ny Gazoil. Tsy izany intsony anefa ny vidin’ny solika amin’izao fotoana izao, hoy ihany ny fanazavan’ity mpitatitra ity. Ankoatr’izay dia nambarany ihany koa fa tsy nahitam-bahaolana manoloana ny fatiantoka mahazo azy ireo ny fifampiresahana tamin’ny fitondram-panjakana. Satria tsy afaka nandray ny 60% amin’ny saran-dàlana ny fitondram-panjakana raha izany no fepetra afahan’ny mpitatitra mihazona ny saran-dàlana amin’izao fotoana izao.
Mbola isan’ny antony nahatonga ireo mpitatitra hampakatra ny sara-pitaterana ihany koa, araka ny filazan’ny filohan’ny UCTU ny fahavononan’izy ireo hanatsara ny kalitaon’ny asan’izy ireo. Tsy afahana manao izany, hoy izy ny tsy fisian’ny tombombarotra azon’izy ireo amin’ny asa ataony. Iaraha-mahalala anefa hoy ihany ity mpitatitra ity fa mitaky hatrany izany fanatsarana ny kalitaon’ny asa izany ny mpanjifa.
Tsy manaiky
An-kilan’izany rehetra izany, mahatsiaro ho voahosihosy kosa mpanjifa manoloana izao fanampahan-kevitry ny mpitatitra izao. Voahosihosy satria, na dia efa misy aza ity fampandrenesana 15 andro mialoha ity, dia tsy nisy kosa ny fifampidinihina tamin’izy ireo momba izany fanampahan-kevitra izany. “Efa nisy ny fifampidinihana tamin’ny sehatra maro, saingy tsy mbola nisy ny resaka tapaka momba izany fampiakarana ny saran-dalana izany. Mahagaga ihany koa fa efa nisy ny soso-kevitra avy aminay vondron’ny mpanjifa kanefa toa tsy nasian’ireo mpitatitra resaka akory ny momba izany”, hoy ny fanamarihana nataon’dRakotorova Rabetsara Lita, filohan’ny Tambajotran’ny Mpanjifa (RNDC). Nilaza ny handray andraikitra amin’ny alalan’ny fanosahana ny governemanta hanapa-kevitra sy handray ny andraikiny manoloana izao fampakarana ny saran-dalana izao, arak’izany, ny vondron’ny mpanjifa. Hisy ny hetsika izay kasain’izy ireo hatao ao amin’ny Tranompokonolona Isotry, mialoha ny datin’ny 1 novambra, fotoana hiakaran’ny saram-pitaterana an-drenivohitra araka ny nambaran’ity filohan’ny Tambajotran’ny mpanjifa ity. Ankoatr’izay dia miantso ny fididiana ny tananan’Antananarivo handray andraikitra ihany koa izy ireo manoloana izao raharaha izao.