Nifanatrika tamin’ireo lehiben’ny Foloalindahy Malagasy

18/10/2012

Tao amin’ny hotely Colbert eny Antaninarenina no nihaona nandritra ny ora maro no nandraisan’ireo lehiben’ny foloalindahy Malagasy, nahitana ireo mmitarika ny polisy sy ny miaramila ary ny zandary, ireo iraka miaramila avy amin’ny SADC izay ahitana manamboninahitra sy manampahaizana momba ny làlana, izay tonga eto Madagasikara mba hanara-maso ny fivoaran’ny fametrahana filaminana ahafahana mampody an-tanindrazana ny filoha teo aloha Marc Ravalomanana. Nisy ihany koa ny fihaonan’ireto delegasiona miaramila avy amin’ny SADC ireto tamin’ny Minisitry

ny Raharaham-bahiny Malagasy. Mitodika any amin’izay mety ho vokatry ny fihaonana eo amin’ireo lehiben’ny Foloalindahy Malagasy sy ireo mpikambana ao amin’ilay delegasiona miaramila nalefan’ny SADC hanao jery todika ny momba ny fitandroana ny fandriam-pahalemana eto Madagasikara sy ny mety na tsy mety hampodiana ny filoham-pirenena teo aloha eto an-tanindrazana ny sain’ny mpanarabaovao amin’izao fotoana izao. Omaly tolak’andro tokoa no nisian’ny fihaonana teo amin’ny roa tonta. Fihaonana izay natao tao amin’ny hotely Colbert etsy Antaninarenina. Naharitra ora maro izany fihaonana izany. Tetsy an-daniny ireo mpitari-tafika Malagasy nahitana ny minisitry ny Fiarovana, ny jeneraly Rakotoarimasy Lucien, filohan’ny CMDM, ny Jeneraly Ranto rabarison, ny lehiben’ny Etamazaoron’ny Tafika, ny jeneraly Ndriarijaona André, ny sekreteram-panjakana miadidy ny Zandarmeria nasionaly, ny jeneraly Randrianazary, Komandin’ny Zandarmaria nasionaly, ny jeneraly Ravalomanana, ny minisitry ny Polisim-pirenena ny Controleur général Razafindrazaka Arsène, ny tale jeneralin’ny Polisim-pirenena ny Controleur Général Rakotondratsima Désiré. Tetsy an-kilany kosa ireo delegasiona miaramila avy amin’ny SADC izay notarihan’ilay jeneraly afrikana tatsimo, Trevor Meyer, ilay jeneraly tanzaniana, Charles Mayunga.
Raha araka ny nambaran’ny jeneraly Ranto Rabarisoa nandritra ny vali-teny fohy nomeny ny mpanao gazety izany nitsena azy teny am-pivoahana tamin’ity fihaonana ity dia mbola nametraka ny ahiahin’izy ireo ny amin’ny mbola tsy fisian’ny antoka ara-pilaminana manoloana ny fiverenana an-tanindrazan’ny filoha teo aloha Marc Ravalomanana izy ireo. Izany hoe mbola tsy nisy fivoarana arak’izany ny fomba fijery sy ny asa nataon’ireto miaramila Malagasy ireto izay raha araka ny tokony ho izy dia manana andraikitra amin’ny fametrahana ny fandriam-pahalemana manodidina ny famerenana an-tanindrazana ny filoha teo aloha Ravalomanana. Na izany na tsy izany, hita taratra tamin’ny fomba famalin’ny jeneraly Ranto Rabarison ny fanontanian’ireo mpanao gazety ihany koa fa mety tsy mitovy hevitra amin’ireo miaramila Malagasy ireo vahiny.
Tsara ny mampatsiahy fa raha araka ny nambaran’ireto vahiny ireto taorian’ny fihaonany tamin’ny minisitry ny Raharaham-bahiny Malagasy omaly maraina dia ny hijery akaiky ny fampiharana izay voalazan’ny tondrozotra ny tena anton-dian’izy ireo. Namafisiny fa tsy maintsy mifanaraka amin’izay voalaza ao amin’izany tondrozotra izany ny fanampahan-kevitra rehetra izay mety ho raisina avy amin’ity fihaonana ity. Efa nisy ihany koa ny fotoana nanambaran’ireto vahiny miaramila ireo fa tsy misy antony hitan’izy ireo manakana ny fiverenana an-tanindrazan’ny filoha teo aloha. Ary farany dia efa nilaza ihany koa izy ireo fa vonona ny handray andraikitra amin’ny fampodoana an-dRavalomanana raha toa ka mila fanampiana amin’izany ny miaramila Malagasy.
Marihina fa nampanantena ny hanao tatitra amin’ny alalan’ny valandresaka ho an’ny mpanao gazety ny momba ny diany teto Madagasikara ireto delegasiona miaramila avy amin’ny SADC ireto, alohan’ny hialany eto amintsika. Andrasana arak’izany izay hambaran’ireto miaramilan’ny SADC ireto rehefa tonga izay fotoana ahavitany ny iraka nampanaovina azy teto Madagasikara izany.