Nankaiza ny volamena 12 kg ?

17/10/2012

Nosamborin’ny mpitandro filaminana ny mambra roalahy ao amin’ny sendikan’ny mpiasan’ny Kraoma ny faha-4 oktobra lasa teo nialohan’ny nanolorana azy ireo teo anatrehan’ny Fampanoavana. Nahazo fahafahana vonjy maika izy ireo tamin’izany ka amin’ny faha-31 oktobra ho avy izao ny fotoam-pitsarana. Izao fisamborana sy fampiakarana azy ireo teo anatrehan’ny Fitsarana izao no setrin’ny fitakiana sendikaly, ny amin’ny tokony hametrahana ny Filan-kevi-pitantanana hisian’ny fitondrana tsara tantana eo anivon’ny Kraoma. Nambaran’ireo solontenan’ny sendikan’ny Kraoma

fa mikatso tanteraka ary tsy afaka hamokatra intsony ity orinasa mpitrandraka kraoma ity satria efa namidin’ny tale vonjy maika, Jeanne Davidson Raholimalala tamin’ny vahiny avokoa ireo faritra misy kraoma tokony hiasan’ny Kraoma. Efa lasan’izany orinasa Mpumalanga Mining Ressources S.A izany avokoa ohatra ny “permis de recherche” n° 39.655, 39.656 ary 39.657 ary efa nandefasan’ity orinasa ity taratasy fampilazana fanombohana ny fitrandrahana ny ben’ny tanànan’Andriamena, Brieville, Manakana, Keliloha ary Ambakireny, ny faha-14 septambra 2012. Tsy misy afatsy ny ao Bemanevoka irery sisa no azon’ny Kraoma trandrahana. Mamono antoka anefa, raha ny filazan’ireo solontenan’ny sendikan’ny mpiasa ny fitrandrahana ao Bemanevoka ary 5 T raha be indrindra ny kraoma mety ho azo amin’izany.Etsy an-danin’izany, mametra-panontaniana ihany koa ireto solontenan’ny sendikan’ny mpiasan’ny Kraoma ireto, mikasika ireo volamena an’ny Kraoma milanja 12 kg. Natao aiza marina izany volamena izany ary firy kilao izy ireo amin’izao fotoana? Manana “comptoir de l’or” ihany koa mantsy ny Kraoma, hoy hatrany izy ireo. Nahatratra 10 kg ny volamena voaangona nanomboka ny taona 2005-2009, nandritra ny fitantanan’i Mejamirado. “Roa kilao monja ve ny volamena voaangona tany amin’ireo “comptoir de l’or” roa ao Maevatanana sy Brieville Andriamena nandritra ny taona 2009-2012?”, hoy ny fanontanian’ireto solontenan’ny sendika ireto. Nambaran’izy ireo hatrany ka fa lasa mihindram-bola any amin’ny banky ny Kraoma amin’izao fotoana izao kanefa nahita tombom-barotra 11 miliara ny taona 2010; 5 miliara ny taona 2011 ary tsy misy vola intsony kosa ny taona 2012. Milaza ho matiantoka vokatry ny fihenam-bidin’ny tsenan’ny kraoma maneran-tany ny mpitantanana, hoy ihany ireto mpiasan’ny Kraoma ireto, kanefa maro ireo antsoina hoe “sous-traitant”. Mba efa nandalo fotoan-tsarotra avokoa ireo mpitantana teo aloha, toa an-dRanaivo Christian sy Mejamirado, hoy hatrany izy ireo, saingy tsy mbola nisy ohatra zava-mitranga nandritra ity fitondrana Tetezamita ity.