Nanamafy ny filatsahan’i Jules Etienne

10/12/2012

Tontosa ny sabotsy lasa teo tetsy amin’ny Espace Jani Soavinimerina ny kongresy nasionalin’ny antoko MAFI (Madagasikara Fivoarana) ka nanamafisan’ireo mpizaika maherin’ny 250 manerana ny Nosy ny maha filohan’ny antokoa ny dokotera Jules Etienne Roland ary indrindra ny filatsahan-kofidiany amin’ny fifidianana filoham-pirenena ny volana may 2013 ho avy izao. Fahaleovantena, firaisan-kina ary fahatomombanana (autonomie, solidarité et excellence) no tarigetra taopaky ny mpizaika tamin’izany. Laharam-pahamehan’ity kandidà avy amin’ny antoko MAFI ity ny ady amin’ny kolikoly izay mahazo vahana tanteraka amin’izao fitondrana tarihin’ny filoha Andry Rajoelina izao. Nasiany tsindrim-peo manokana nandritra ny lahateniny ireo fanambarana nataon’ny Fiombonamben’ny Eveka eto Madagasikara sy ny Transparency International, izay namaky bantsilana tanteraka ny fahalovana misy eto amin’ny firenena.

Mpanao politika maro no namaly ny fanasana nataon’ny MAFI nandritra izany kongresy nasionaly izany, toa ny ministry ny Fitsinjaram-pahefana, Ruffine Tsiranana ; ny minisitra teo aloha Vola Dieudonné Razafindralambo ; ny mambra ao amin’ny Kongresin’ny Tetezamita Pierre Lenoble ary Harinaivo Rasamoelina avy amin’ny antoko DHD ny izay nisolontena ireo mpanao politika rehetra tamin’ny fandraisam-pitenenana. Miara-dia amin’ny antoko MAFI ihany koa ny fikambanana Ainga ho an’i Madagasikara naorin’ny praiminisitra lefitra teo aloha, Zaza Ramandimbiarison. « Fampandrosoana ary fanomezana ny anjara masoandron’ny tsirairay » moa no tarigetran’ity fikambanana natsangan’ny tale kabinetran’ny prezidansa teo aloha ity.
Nambaran’ny filohan’ny MAFI nandritra ny tafa nifanaovany tamin’ny mpanao gazety àry fa mitazona ny daty voatondro hanatanterahana ny fifidianana filoham-pirenena amin’ny volana may 2013 ny tenany. « Filoham-pirenena no olana eto amin’ny firenena mampikatso ny zava-drehetra noho ny tsy fisian’ny fankatoavana iraisam-pirenena ka tsy maintsy hirosoana ny fifidianana », hoy Jules Etienne Roland. Naneho endrika mpampivondrona ireo hery politika eto amin’ny firenena ny antoko MAFI nandritra ity kongresy ity ; nahitàna ireo minisitra sy tomponandraikitra ambony nandritra ny fitondrana nifandimby, Didier Ratsiraka, Zafy Albert sy Ravalomanana Marc ary ny avy amin’ny fitondrana Andry Rajoelina.