« Tombontsoa frantsay », hoy Radanoara Julien

10/12/2012

Samy manana ny heviny ireo mpanara-baovao manoloana ny filazan’ny SADC fa ny fandresen-dahatra ny Filoha teo aloha Marc Ravalomanana sy ny Filohan’ny Tetezamita Andry Rajoelina tsy hilatsaka ho fidina filoham-pirenena no vahaolana amin’ny lrizy eto Madagasikara. Santionany amin’izany ny fanehoan-kevitra nataon’ny mpandinika fiaraha-monina Paul Rabary sy ny manampahaizana amin’ny fifandraisana iraisam-pirenena Radanoara Julien. Paul Rabary: “Fanampahan-kevitra feno fahendrena iny noraisin’ny SADC iny satria tsy misy afa-tsy izay no ahafahana mamaha ny krizy eto Madagasikara”.

Izay no nambaran’ity mpandinika fiaraha-monina ity raha namakafaka ny fanambaran’ny SADC ny tenany. Io fanampahan-kevitra io, hoy izy, no tena nandrasana avy amin’ity vondrona ity satria “tsy tokony hifantoka amin’ny famahana ny olana misy eo amin’ireo olona roa ireo ny famahana ny krizy eto Madagasikara”. Nambarany ihany koa fa tsy tokony hiteraka korontana na fanoherana avy amin’ny mpomba ny filoha teo aloha sy ny filohan’ny tetezamita izany fanampahan-kevitry ny SADC izany satria “tsy tsangan’olona fa tsangan-kevitra no tokony hibaiko ny fanaovana politika eto amintsika. Raha mandinika tsara ireo mpomba ny filoha teo aloha sy ny filohan’ny tetezamita dia tokony ahatsapa fa ny filatsahan’izy mirahalahy ireo no tena hiteraka krizy vaovao raha oharina amin’ny tsy filatsahany. “Tsy isalasalana, hoy izy fa samy tsy hanaiky izay vokam-pifidianana izay resy eo”, hoy ny fanamarihany.
Mahakasika ny filohan’ny Tetezamita manokana, nambaran’i Paul Rabary fa tsy tokony hametraka olana amin’izany izy satria raha oharina amin’dRavalomanana dia manatombo ny tenany raha ampiharina iny fanampahan-kevitry ny SADC iny. Satria na dia tsy afa-milatsaka azan ny tenany amin’izao fifidianana ho avy izao dia mety mbola afaka hilatsaka ny tenany amin’ny fifidianana manaraka. Nambarany ihany koa fa hanamafy ny tsy fankatoavan’ny fianankaviambe iraisam-pirenena ny fitondrana tarihany ny tsy faneken-dRajoelina an’ity soso-kevitra avy amin’ny SADC ity. Inoana anefa, hoy ihany ity mpandinika fiaraha-monina ity fa tsy handà an’izany ny filohan’ny tetezamita satria efa hita taratra tamin’ny fihaonana tany Seychelles ny fahavononany tsy hilatsaka ho fidina filoham-pirenena.
Radanoara Julien: “Paik’ady avy amin’ny frantsay io tsy famelana an-dRajoelina sy Ravalomanana hilatsaka ho fidina filoham-pirenena io, satria efa manana olona hatolotra eo amin’izany fifidianana filoham-pirenena eto Madagasikara izany ity firenena ity”.
. Ny Frantsay, hoy izy, dia manana tombontsoa amin’ny tsy filatsahan-dRavalomanana izay atahorana fatratra ny hahatafaverina azy eo amin’ny fitondrana toa an-dRatsiraka taorian’ny fitondran’i Zafy Albert.
“Aza adino, hoy ihany Radanoara Julien, fa maro ireo tranga tato ho ato izay ahitana taratra ny mety ho faneren’ny Frantsay ny SADC mba tsy ahafahan-dRavalomanana miverina eo amin’ny fitondrana”. Mety ho isan’izany, hoy ihany ny fanazavany, ny nahatongavan’ny minisitry ny raharaham-bahiny izay nanao fitsidihana ofisialy tany Frantsa tahoakelin’ny fihaonana antampon’ny SADC. Tokony tsy hadino ihany koa, hoy ihany izy, fa mikaro-dalana fatratra ho tafiditra ho isan’ireo firenena mpikambana ao amin’ny Filankevim-pilaminan’ny Firenena Mikambana i Afrika Atsimo. Ho sarotra amin’ity farany anefa ny ho lasa eo amin’izany toerana izany raha tsy mahazo ny fanohanan’ny Frantsay izy ireo. Ary dia iarahan’ny rehetra nahita ny fahatongavan’ny minisitry ny Raharaham-bahiny Frantsay tany Afrika atsimo farany teo.
Mbola antony ilazana ny fissian’ny tombontsoa Frantsay ao ambadik’iny fanampahan-kevitry ny SADC iny ihany koa ny fandrenesana tamin’ny herinandro lasa teo ny fahavononan’ny Nosy Maurice hanohana ara-bola ny fampandehanana ny fifidianana eto Madagasikara. Ity Nosy ity izay mpikambana ao amin’ny COI ary tsy mbola nitodi-doha tamin’ny famahana ny olana teto Madagasikara hatramin’izay.
Na izany na tsy izany tsy mbola azo antoka ny ahitam-bahaolana avy amin’ny fampiharana an’ity tsy famelana azy roalahy hilatsaka ity. Iaraha-mahalala, hoy Radanoara Julien fa tsy hipetra-mora amin’izany ihany koa ny amerikanina izay manana tombontsoa arovana amin’izany. Tsy tongatonga foana, hoy ihany ny fanazavany, ny fisian’ireny fanamelohana nataon’ny “Amnesty International” farany teo iny, sy ny tsy fankatoavan’ny amerikana an’izao tetezamita izao hatramin’ny voalohany. “Azo inoana fa tsy maintsy hanana akony eo amin’ny fifidianana ihany koa izany rehetra izany”, hoy ity manam-pahaizana eo amin’ny fifandraisana iraisam-pirenena ity.