Notsipahin’ireo Sekoly Katolika Rajoelina

12/12/2012

Tapa-kevitra tanteraka ny tsy hanaraka ny baikon’ity fitondrana Tetezamita ity ve ny Sekoly Katolika ? Izay no fanontaniana teo ambavan’ny mpanara-baovao maro raha nahita fa tsy nanaraka ny baikon’ny fitondran-dRajoelina mikasika ny maha andro tsy fiasana nefa andraisan-karama ny 11 desambra ny ankamaroan’ireo toeram-pampianarana tantanan’ny Fiangonana Katolika teto andrenivohitra. Nanava-tena ireo Sekoly Katolikamaro teto an-drenivohitra, omaly 11 desambra.

Raha tsy nisy fampianarana tany amin’ireo sekoly hafa, nohon’ny baikon’ny Fitondrana tetezamita, dia ninia tsy nijery an’izany kosa ireo toeram-pampianarana tantanan’ny Fiangonana Katolika teto an-toerana, raha tsy hiteny afa-tsy ny Sekoly Saint Antoine sy ny Saint Xavier Antanimena ary ireo Sekoly hafa ihany koa isika, izay samy nampianatra ny mpianatra tao aminy avokoa omaly. Raha jerena dia tsy nisy afa-tsy ny sekolin’I Mompera Pedro teny amin’ny Akamasoa ihany no tsy nianatra tamin’ireo Sekoli Katolika teto andrenivohitra, omaly 11 desambra. Tsara ny manamarika fa nivahiny teny amin’ny Akamasoa ny filohan’ny Tetezamita tamin’ny Alahady teo. Tsy mahagaga arak’izany raha voatery nanaraka ny baikon’ny filohan’ny tetezamita ny sekoly tany amin’izany toby izany.
Mazava loatra fa samy manana ny mety hanazavany an’izay tranga izay ny isan’isany avy. Manana ny antony nanaovan’izy ireo an’ity fihetsika ity ihany koa anefa ireo sekoly lehibe ireo, matoa sahy nandà an-kitsirano izao ny baiko nomen’ny fitondrana tetezamita mahakasika ny fanamarihana ny tsingerin-taonan’ny Repoblika fahaefatra sy ny fitokanan’ny filohan’ny Tetezamita ny zavabitany.
Na izany na tsy izany, tsy azo odian-tsy hita ihany koa fa tsy vitsy tato ho ato ny fihetsiky ny Fiangonana katolika izay hita taratra fa miala tsikelikely amin’ny fanohanana an-jambany an’ity fitondrana ity. Isan’ny manamarina an’izany ny voarakitra tao amin’ilay fanambaran’ny Fivondronamben’ny Evekan’i Madagasikara izay nampibaribary ireo tsy fanajana ny zon’olombelona sy ny fapahoriana ny vahoaka ataon’izao fitondrana izao.