Andramena 3 camions indray no sarona

12/12/2012

Fiarabe mpitatitra fasimainty sy vatokely izay fampiasan’ny orin’asa Mailand no tra-tehaka nitatitra bolabolana andramena avy any Soanierana Ivongo nihazo an’i Toamasina ny alatsinainy teo. Komisiona manokana nahitana parlemantera avy amin’ny tetezamita no nahatratra ity fiarabe miisa telo nitondra « bois de rose » teny amin’ny lalam-pirenena faha-5 ity. Nambaran’izy ireo fa voaporofo ny fahamarinan’ny fanambarana nataon’ny Tangalamena Zakariasy, ary takiana ny famoahana azy avy anya m-ponja. Mbola misy ary mitohy hatrany, arak’izany ny fitrandrahana antsokosoko an’ity harem-pirenena ity, na dia efa nisy aza ny didim-panjakana mandrara an’izany izay noraisin’ny fitondram-panjakana amin’izao fotoana izao.

Voaporofo indray amin’izao fotoana izao fa tsy voafehin’izao fitondrana izao mihintsy ny fiarovana ny harem-pirenena. Hatreto dia toy ny rano atsipy eny an-damosin-gisa ny ambara fa fandraisan’andraikitra ataon’izany fitondrana izany hamongorana ny fandripahana tsy ara-dàlana sy ny fanondranana an-tsokosoko ny andramena. Voaporofo ihany koa an-koatr’izany ny fahamarinan’ny fijoroana vavolombelona nataon’ny Tangalamena Zakariasy Patrick, mikasika ny mbona fisian’izany trafikana andramena izany amin’izao fotoana izao. Ny Tangalamena izay nampididina am-ponja vokatr’izany fanambarana nataony izany, ary mbola any am-ponja mandrak’androany.
Araka ny fantatra dia Camion mpitatitra fasimainty sy vatokely tao amin’ny orin’asa Mailand no nahatratrarana bolabolana andramena miisa 180 eo ho eo tamin’ny alatsinainy teo. Avy any Soanierana Ivongo ireo fiarabe miisa telo nitondra “bois de rose” ireo, ary nikasa ny hihazo an’i Toamasina. Tokony ho tamin’ny telo ora maraina no nahatratrarana azy teo amin’ny fokontany Tanambao Nosibe. Efa naraha-maso nandritra ny roa andro hatrany Ampasimbe Onibe kosa ireo fiarabe ireo, raha ny filazan’ny mpiasan’ny tomponandraikitry ny ala sy ny tontolo iainana any Toamasina. Marihina fa nitsoka nandositra avokoa ireo mpamily an’ireto fiara ireto sy ireo naira-dia tamin’izy ireo. Izany ho tsy nisy olona na iray aza voasambotra niaraka tamin’ireto fiarabe ireto. Mbola tsy hita kosa ireo olona voalaza fa tompon’ireo fiarabe ireo, indrindra fa ireo atidoha nikotrika an’ity trafika ity.
Ny fanazavana nandritra izao fahatratrarana an’ireto andramena ireto izao ihany koa no nahafantarana fa naondrana tamina sambo kely ireo andramena ireo rehefa niainga teo anelanelan’ny Mananara avaratra sy Maroantsetra. Teo amin’ny faritra iray tsy lavitra ny orin’asa fitrandrahana fasimainty ao Soanierana Ivongo kosa no nampidinina avy amin’ilay sambokely izy ireo, ary teo indray dia notaterina tamina fiara 4x4 nankeo antampon-tananan’i Soanierana Ivongo. Hatreo amin’ity tanana ity vao naondrana tamin’ireo fiarabe mpitatitra fasimainty sy vatokely tao amin’ny orinasa Mailand ireo ny entana ka saika halefa tany Toamasina.

« Tsy misy zavatra foronina eto fa manamarina ny nambaran’Atoa Zakariasy Patrick izao zava-mitranga izao. Nahoana anefa no izy indray no gadraina sy nahintsana ny hasiny amin’ny maha-tangalamena azy ». Izay no nambaran’i Henry Lecacheur mpikamaba amin’ny Filan-kevitra avon’ny tetezamita ary isan’ireo nandrafitra ilay kaomisionina manao fanadiadiana mikasika ny raharaha andremana sy fitrandrahana harena an-kibon’ny tany, raha naneho ny heviny mahakasika an’ity fahatratrarana an’ireto Camions feno bois de rose ireto ny tenany.
« Mangataka ny famotsorana vonjy maika ny Tangalamena Zakariasy izahay parlemantera ao anatin’ny kaomisionina, satria tokony hamafisina ny fanadiadiana mikasika ity raharaha andremana ity. Tsy azo ekena koa ny fampidirana ampoja ireo mpamily sy ireo mpitatitra an’ireto andramena ireto kanefa ireo ati-doha mpikotrika izany milamina sy misy mpiaro avy ao anivon’ny fanjakana. Marary ny fonay zanaky Toamasina amin’ny hanaovana iny tangalamena iny, nefa tsy namorona sy tsy nadainga izy fa nilaza ny zavatra hitany sy nanaovany fikarohana », hoy ihany koa fanamarihan’ny CST iray, zanak’i Toamasina ary iray amin’ireo mambra ny komisiona nanao fanadiadiana mikasika ny andramena sy harena ambanin’ny tany any an-toerana.
Tsar any manamarika fa tsy voalohany no nahatratrarana andramena toy izao tamin’iny lalam-pirenena faha-5 iny. Araka ny loharanom-baovao dia faninefany izao no nahitana tranga toy izao tany an-toerana. Tsy fantatra mariha anefa hatramin’izao izay tohin’ireo raharaha teo aloha. Marihina fa polisy 4 sy zandary 12 be izao no manao fisavana eo anelanelan’i Soanierana Ivongo sy Toamasina, kanefa dia eo amin’izany lalana izany indrindra no tena famezivezen’ny fiara mpitondra andramena an-tsokosoko. Fantatra ihany koa ankoatr’izay fa efa nahazo fahafahana vonjimaika voaroiroy tamin’ny fahatratrarana andramena tamina kontenera roa tamin’ny volana aogositra. Ny loharanom-baovao ihany koa no nilaza fa nanjavona avoka nanjavona tsy ao an-toerana intsony ilay kaontenera feno andramena izay tratra ary napetraka tao amin’ny SMATP any Toamasina. Mbola ao an-toerana kosa ireo izay napetraka tao amin’ny biraon’ny Ala sy ny Tontolo iainana