Nahazo fihofanana ireo talem-paritra

12/12/2012

Nizaika teto Antananarivo nandritra ny andro maromaro ary nifarana tamin’ny zoma 7 desambra lasa teo, ireo talen’ny Varotra manerana ny faritra 22 eto Madagasikara. Fanamafisana ny fahaiza-manaon’izy ireo no tena votoatin’ity fampihofanana ity. Teo ihany koa ny fampahafantarana azy ireo ny tahirin-kevitra mirakitra ny fomba ifandraisany amin’ny ministeran’ny Varotra izay mpiahy azy ireo. Ankoatr’izay dia voaresaka ihany koa ny mikasika ny fanondranana entana avy any ivelany. Nifarana ny Zoma 7 desambra teo ny fanofanana ireo talem-paritry ny Varotra avy amin’ireo faritra 22 manerana ny Nosy.

Fanofanana izay natao teto Antananarivo. Tanjon’izany fanofanana izay ny fanamùafisana ny fahaiza-manaon’ireto Talem-paritra ireto eo amin’ny lafiny ara-teknika mahakasika ny andraikitra sahanin’izy ireo. Mazava loatra fa izao fanofanana izao ihany koa no làlana iray nahafahan’ireo talem-paritra ireo nampahafantatra mivantana ireo olana sedrain’izy ireo manoloana ny fanatanterahana an-tsakany sa an-davany ny asany any amin’ny faritra misy azy isan’isany avy. Afaka nampahafantatra izany mivantana tamin’ireo tompon’andraikitra ambony isan’isany avy ao anivon’ny ministeran’ny Varotra izy ireo nandritra ny fotoam-panofanana, ary mazava loatra fa nazoam-baliny mivantana avokoa izany rehetra izany. Ankoatr’izany dia isan’ny naha-zava-dehibe an’ity fihofanana ity ihany koa ny fahafantaran’ireo talem-paritra an’ireo tompon’andraikitra samifaha mety hifanandrify amin’ny asa sahanin’izy ireo. Izany hoe mahafantatra ny tokony hatonina izy ireo amin’izao fotoana izao raha misy ny olana eo amin’ny fanatanterahana ny asany.
Mbola isan’ny tombony tamin’ny fanatanterahana an’ity fivoriana ity ihany koa ny fampahafantarana an’ireo mpizaika ny tahirin-kevitra mirakitra ny toro-marika amin’ny fampandehanan-draharaha amin’ny ankapobeny ao amin’ity ministera ity. Hatreto, arak’izany dia tsy tokony hanao fahadisoana amin’ny fomba fiseraserana eo aminy sy ny tompon’andraikitra isan-tsokajiny ireo talem-paritry ny Varotra manerana ny Nosy. Tsara ny mampatsiahy fa ireo talen’ny Varotra no masoivohon’ny ministeran’ny Varotra eny an’ivon’ny Faritra isan’isany avy. Isan’ny andraikitra lehibe nankinina tamin’izy ireo ny fiarovana ny mpanjifa tsy an-kanavaka sy ny fampiroboroboana ny varotra amin’ny ankapobeny any amin’ny faritra misy azy ireo. Tsara ihany koa ny manamarika fa isan’ny nanokanana fotoana manokana nandritra ity fanofanana ity ny fanomezana toro-marika an’ireo talem-paritry ny Varotra mikasika ny fampiroboroboana ny fanondranana entana eo amin’ny tsena iraisam-pirenena.
Nandritra ity fanofanana ity no nitondran’ny Sekretera Jeneralin’ny ministera fanazavana mikasika ny fanendrena talem-paritra vaovao miisa 17 izay vao nandraisana fanampahan-kevitra teo anivon’ny Filankevitry ny minisitra ny herinandro lasa teo.