Vadina jeneraly iray mampihorohoro

13/12/2012

Mihorohoro tanteraka ny mpiasa ary ireo teratany Sinoa tompon’ny orinasa 3MDP (Three Dragons Metallurgical Product) etsy Ambohimanambola tato anatin’ny herinandro mahery kely izao. Misy vadina jeneraly nitàna andraikitra ambony teo anivon’ny Sekreteram-panjakana miadidy ny Zandarimaria izany mantsy mampiasa ny anaran’ny vadiny etsy sy eroa, eny hatreny anivon’ny pôlisim-pirenena. Olana teo amin’ireo Sinoa no niandohan’ny raharaha, araka ny tafa nifanaovana tamin’ireo mpiasan’ny 3MDP. Nisy teratany Sinoa iray izany niara-niasa tao teo aloha; nisy anefa ny fifandirana ka dia niala ity farany. Manana sakaiza Malagasy ity teratany Sinoa niala ity izay havan’ny vadin’ilay jeneraly avy ao amin’ny Zandarimariam-pirenena.

Nitondran’ilay vadina jeneraly zandary, pôlisy, mpiasan’ny Asam-panjakana tao amin’ilay orinasa, araka ny resaka nifanaovana tamin’ireo mpiasa tamin’ny mpanao gazety teny an-toerana. Izy mihitsy no nitarika azy ireo tahaka ireny manana andraikitra ambony ao anivon’ny fitondram-panjakana. Nihorohoro tanteraka ireo mpiasa noho ny fihetsika nataon’ity vadina manamboninahitra jeneraly ity. Tamin’ny fotoana tsy naha teto an-drenivohitra ny tompon’ny orinasa no nahatongavan’izy ireo tao, kanefa dia nentin’ireto manampahefana ireto noho ny baikon’ny vadin’ilay jeneraly hatramin’ny antontan-taratasy momba ny orinasa, nentin’izy ireo niaraka taminy teny amin’ny pôlisy misahana ny Sisintany ihany koa ny zanaka lahin’ny tompon’ny orinasa sy ny rahalahiny, nalaina am-bavany. Nanomboka tamin’ny 6 ora hariva ny fanadihadiana ka tsy nifarana raha tsy tamin’ny 12 ora alina. Nalaina am-bavany nandritra ny indray andro manontolo ihany koa ny tompon’ny orinasa roalahy rehefa tafaverina avy tany Manjakandriana.
Hentitra tamin’ny fanambarany kosa ireo mpiasa nitafa tamin’ny mpanao gazety fa tsy eken’izy ireo raha misy fikasan-dratsy hanakatona ny orinasa izay mamelona azy ireo sy ny vady aman-janany. Nanambara mihitsy ireo mpiasa fa “azoazo ny karama ary tsy dia misy fanerena amin’ny fanatanterahana ny asa”. Nifantoka tany amin’ilay vadina jeneraly avokoa ny resak’ireo mpiasa nitafa tamin’ny mpanao gazety ary dia samy nilaza avokoa fa tena mihorohoro tanteraka noho izao raharaha izao. Fahefana avy aiza tokoa moa ny an’izany vadina jeneraly izany no afaka hibaiko pôlisy sy zandary ary mpiasam-panjakana amina raharaham-panjakana (administratif). Azo hadika ho « trafic d’influence » izao fihetsika ataon’ity vadina jeneraly ity izao ary efa vaky vava hatramin’ny mpitandro filaminana mihitsy aza, raha ny angom-baovao. Ndrao dia mba tian’ity vadina jeneraly ity honerana vola be kosa ary ilay teratany Sinoa sakazain’ilay fianakaviany ka ireo mpiasa no hatao fitaovana hatongavana amin’izany? Ho hita eo moa ny tohin’ny raharaha; efa niverina tany amin’ny toeram-piasany avokoa mantsy ireo mpiasa, nahazo fampanantenana avy tamin’ity vadiny jeneraly ity. Fantatra ihany koa fa manaraka akaiky izao raharaha izao ny manampahefana. Tsy amin’izao fotoanan’ny krizy sy ny tsy fisian’asa izao tokoa mantsy no hanakorontanana izao izay mbola manana asa hivelomana. Tsy vitan’izany fa manaratsy endrika ny Zandarimaria sy ny Foloalindahy izay efa hampangain’izao karazana fikambanana iraisam-pirenena izao.