Ankizy 30 000 tandindomin-doza

14/12/2012

Manao antso avo amin’ireo mpanapa-kevitra, miankina na tsy miankina amin’ny fanjakana, ny tambajotran’ireo fiarahamonim-pirenena miantsehatra amin’ny fitaizana ireo zaza kamboty na ireo ankizy sahirana manerana ny Nosy. Ny fatapahan’ny famatsiana ara-tsakafo avy amin’ny PAM no anton’izany antso avo izay. Nambaran’ny fanambarana nataon’izy ireo fa zaza maherin’ny 30 000 manerana ny Nosy no tsy hanan-tsakafo ho hanina vokatry ny tsy fisian’ny fanomezana avy amin’ity sampan-draharaha iraisam-pirenena ity, raha toa ka tsy misy ny fandraisan’andraikitra manoloana izany.

Tsy afaka mamatsy ara-tsakafo ireo ivo-toerana tantanan’ireo fikambanana samihafa, miankina na tsy miankina amin’ny fanjakana, ka mitaiza zaza kamboty sy ankizy sahirana manerana ny Nosy intsony ny sampan-draharahan’ny Firenena Mikambana misahana ny Sakafo n any PAM eto amintsika. Antony maro no voalaza fa mahatonga an’ity sehatra ity tsy hanao izany fanampiana izany intsony. Isan’izany ny krizy misy maneran-tany izay nampiova ny fanomezana azon’ny PAM avy amin’ireo firenena mpiara-miombon’antoka aminy. Tsy vitsy amin’ireto farany no nanafoana tanteraka ny famatsiana ara-tsakafo ny PAM. Ankoatr’izay dia mbola isan’ny nahatonga ny fatapahan’ny famatsiana ara-tsakafo azon’ny PAM ihany koa ny vokatry ny krizy lalovan’ny firenena hatramin’ny taona 2009 no mankaty.
Misedra olana noho izany ireo fikambanana na sehatra mitaiza ireny zaza kamboty na ireny zaza sahirana ara-pivelomana ireny manerana ny Nosy, noho izy ireo niantehatra tamin’ny fanampiana ara-tsakafo avy amin’ny PAM tamin’ny fanatontosana ny asany. Tsy izy ireo ihany no hisadra olana fa eo ihany koa ireo sekoly maro any amin’ny faritra isan’isany avy eto Madagasikara, indrindra ny any atsimo izay novatsian’ny PAM ara-tsakafo hatramin’izay. Raha araka ny isa navoakan’ny Tambajotran’ny fiaraha-monim-pirenena mpiahy ny ankizy na ny “Plate-Forme de la Société Civile pour l’Enfance” (PFSCE) dia tsy latsaky ny 30 000 ireo zaza tsy hanan-tsakafo manomboka amin’ity volana ity noho izao fatapahan’ny fanampian’ny PAM izao eto Madagasikara. Eto Antananarivo avokoa ny 2500 amin’ireo ankizy ireo. Marihana fa mahatratra 23 ireo fikambanana mikambana ao amin’ny PFSCE ka isan’izany ny Aide et Action, Aléa des possibles, ASMAE, ASEFEMA, ATD-quart monde, Avotra FFF, Centre Notre Dame de Clairvaux, ENDA Océan Indien, Gazela pour le dévéloppement social, Graines de Bitume, Grandir Dignement, Groupe Développement, Hardi, Lakana; Les enfants du Soleil; ManaoDE, Manda, REV, SOS Villages d’enfants, TAVA, Terres des enfants la Ruche, Yamuna d’aide à l’enfance, ary ny YMCA. Ivo-toerana mpiahy ny ankizy sahirana miisa 150 manerana ny Nosy no sahanin’ireo fikambanana ireo ary voakasika mivantana amin’ity olana ity.

Araka ny nambaran’i Razafintsalama Romeo, tompon’andraikitra amin’ny fifandraisana ami’ny PFSCE dia efa nisy ny fanairana nataon’izy ireo tamin’ny roa volana lasa. Nisy ihany, saingy vitsy dia vitsy ny namaly ny antson’izy ireo. Raha ny momba ny fanampiana avy amin’ny fanjakana manokana dia nambaran’ity tompon’andrikitra ity fa misy ihany izany saingy tsy mahakasina ny lafiny ara-tsakafo. Marihina fa ankoatry ny tsy fisihan’ny sakafo dia isan’ny fiatraikan’izany ihany koa ny fialana an-daharan’ireo ankizy eny an-tsekoly.