Tsy nankatoavin’ny Filankevitry ny Governemanta

14/12/2012

Ny fananganana ny Politikam-pirenen’ny Asam-panjakana no heverin’ny Filankevitry ny Governemanta fa laharam-pahamehana mba ahafahana miroso amin’ny fampiharana izay tapaky ny Filankevim-pirenen’ny Asam-panjakana. Ity rafitra ity izay handraisan’ny manampahaizana samihafa eo amin’ny sehatry ny Asam-panjakana anjara no handrafitra ny volavolana Didim-pitondrana mikasika ny marin-karaman’ny mpiasam-panjakana. Tsy mbola ho amin’ity taona ity no hivoaka ny Didim-pitondrana mamaritra ny mari-karama vaovao izay narosoan’ny Filankevim-pirenen’ny mpiasam-panjakana.

Nandritra ny Filankevitry ny Governemanta izay natao teny amin’ny Lapan’ny Mahazoarivo ny 12 desambra lasa teo no nanoloran’ny minisitry ny Asa sy ny Lalana sosialy ny vaolavolana Didim-pitondrana momba ny fanovana ny marinkaraman’ny mpiasam-panjakana, izay notinapaky ny fivoriamben’ny mpiasam-panjakana izay natao farany teo teto amintsika (Projet de Décret fixant les grilles indiciaires de traitement des fonctionnaires). Teo ihany koa ny volavolana Didim-pitondrana momba ny fanasokajiana ireo asam-panjakana isan’isany avy eto Madagasikara (Projet de Décret portant classement hiérarchique des corps de fonctionnaires). Tsy naharesy lahatra ny Filankevitry ny Governemanta anefa izany ary tsy nandray fanampahan-kevitra amin’ny fampiharana avy hatrany an’ity fanampahankevitry ny mpiasam-panjakana ity ny mpivory. Araka ny nambaran’ny tatitry ny Filankevitra dia fananganana ny Filankevim-pirenen’ny Asam-panjakana tsy maintsy irosoana voalohany. Filankevitra izay hatsangana amin’ny alalan’ny famoriana ireo rehetra voakasiky ny fampiharana ny fanovana ateraky ny mety ho fampiharana an’ireo volavolan-kevitra naroson’ny mpiasam-panjakana ireo. Kendrena apetraka alohan’ny faran’ny volana janoary hoa avy io izany rafitra izany raha araka ny nambaran’ny filankevitry ny Governemanta ihany.
Tsara ny mampatsiahy fa niainga avy tamin’ilay fivoriamben’ny mpiasam-panjakana izay natao teny amin’ny CCI Ivato ny fandrafetana an’ilay volavolana marikarama vaovaon’ny mpiasam-panjakana. Fivoriana izay nandraisan’ny solontenan’ny mpiasam-panjakana sy ny sendika samihafa anjara. Tsy isalasalana arak’izany ny mety hisian’ny tsy fahafaliana eo anatrehan’izao tsy fanekena ny fanampahan-kevitr’izy ireo izao. Ny mpiasam-panjakana izay saika efa tapitra nanao hetsika fitakiana ny fanatsarana ny asan’izy ireo avokoa amin’izao fotoana izao. Tsy azo adino ihany koa ny fiatrehana ny fifidianana amin’ny taona ho avy izay heverin’ny mpiasam-panjakana sasany fa antony nahatonga an’izao fisalasalana amin’ny fanatanterahana avy hatrany ny fanampahan-kevitr’izy ireo izao. Manahy mafy ny hanaovana izany ho fitaovana hanerena azy ireo mandritra ny fifidianana an’ity fanavaozana ny marikarama ity ny maro amin’izy ireo.