Mitaky ny handraisan’ny Kaomina ny fitantanana ny tany

17/12/2012

Naneho ny heviny mahakasika ny famolavolana ny lalàna sori-jotra momba ny Fanajariana ny Tany (Loi d’Orientation sur l’Aménagement du Territoire, LOAT) ny Fikambanana miaro ny tany malagasy fantatra amin’ny anarana hoe TANY. Tamin’ny alalanny fanambarana izay navoakan’ity fikambanana ity no nilazany fa ny kaomina no tokony hatao vondrom-paritra mahefa amin’ny famaritana sy fifehezana ny fitantanana ny velaran-tany. Takin’izy ireo arak’izany ny tekony hamindrana ny fahefana sy ny ho enti-manana momba izay fitantanana ny tany izany ho eny an’ivon’ny kaomina. Tokony hantsangana ihany koa ny vaomiera misokatra momba ny fananan-tany, izay hanampan-kevitra momba ny fananan-tany, ny fivarotan-tany ary ny fazoan-dàlana mitrandraka tany sy harena an-kibon’ny tany amin’ny faritra isanisany avy.

Nasongadin’ny fanambarana nataon’ny fikambanana Tany fa « ny kaominina no vondrom-paritra mifanandrify indrindra amin’ny famaritana sy fifehezana ny fitantanana ny velaran-tany, amin’ny alalan’ny famantarana sy ny fampitahana ny fananana misy sy azo trandrahana, amin’ny andaniny, ary ny isan’ny mponina ankehitriny sy ao aoriana, amin’ny ankilany ». Akoatr’izay dia nambaran’ity fikambanana ity ihany koa fa mitaky fitsinjaram-pahefana tena tomombana ny fitantanana ny tany any amin’ny kaominina rehetra, na manana birao ifoton’ny fananantany izy amin’izao fotoana izao na tsia. « Ny fanekena io foto-kevitra io dia midika fa hisy famindram-pahefana miampy famindrana ny ho enti-manana avy amin’ny fanjakana foibe mankany amin’ny kaominina. Ankoatry ny andraikitra avo (fonctions régaliennes) hiantsoroan’ny fanjakana foibe eo amin’ny firenena manontolo sy ny fampiharany ny zo sy ny andraikiny eo amin’ny tanin’ny fanjakana tsy azo amidy sy azo amidy (publics et privés), dia ho andraikitry ny fanjakana foibe eo amin’ny fitantanana ny velarantany ny mandrindra, manara-maso ary manara-dia ny kaominina tsirairay toa ny mpiombon’antoka - amin’ny alalan’ireo sampandraharahany fanapariaham-pahefana - ka manatanteraka ireo andraikiny amin’ny maha mpiantoka ny firaisakinam-pirenena sy mpiambina ny fiandrianam-pirenena azy. Io fitantanana anivon’ny kaominina io dia hanainga sady hampivelatra ny fiombonan’antoky ny olom-pirenena ary ny fandraisany anjara mavitrika, ahatonga azy handray anjara feno kokoa amin’ny famolavolana sy fanapaha-kevitra, hiara-hiasa be be kokoa, hitsikera, hanao soso-kevitra, sy ahatsapa ny lesoka, ny filàna ary ny heriny ».
Ankoatr’izay dia manoso-kevitra ny hananganana Vaomiera misokatra momba ny fananan-tany izay hisy ny Ben’ny tanàna, ny mpanolo-tsaina voafidy, ireo Olom-be ara-paharazana sy ireo ray aman-drenin-tanàna manan-kasina, ireo filoham-pokontany ary olo-tsotra mananjo maro misolo-tena ny ampaham-piaraha-monina misy azy avy ny Fikambanana Tany. “Ilaina vatsiana feno ara-baovao io vaomiera io ary ilaina hanome ny heviny mahakasika ny fikasana hanofa tany na hivarotra tany na ny fahazoan-dalàna hitrandraka tany na harena anivon’ny tany eo amin’ny sehatry ny kaominina… Ilaina vatsiana sy hanome ny heviny toy izany koa ny mponina rehetra voakasik’ireo tetik’asa ireo mivantana na mety iantefàny sy iharany. Mangarahara, fanaraha-maso ary fifamalian-tanana (redevabilité) no ho foto-kevitra hitantana ny fitondran’ny kaominina”, hoy ny famaritan’izy ireo ny asan’izany vaomiera izany.
Marihina nanamafy ny maha tsy azo iodivirana ny fanamafisana ny traikefan’ireo olona miasa any amin’ny kaominina ny fikambanana Tany. Fanampiana ara-tekinika sy fandaminana mivoatra hatrany no harafitra sy hafototra eo anivon’ireo mpamokatra madinika hampatanjaka ireo fitaovam-pamokarana hanatsarany ny zava-bitany. Farany dia notsipihan’ny fanambarana fa ny lokan’ady eo amin’ny fifanakalozan-kevitra ankehitriny dia ny fakàna fanapahan-kevitra amin’izay safidy ara-tetika:
- fanajariana ny tany miankina amin’ny ankamaroan’ny mponina ary miaro ny tombontsoany ho amina fanorenana fiharian-karem-pirenena mahaleotena sy fiaraha-monina araka ny hitsiny
- sa fanajariana ny tany mikatsaka fampandrosoana mihazakazaka ivelany manome fahafaham-po olombitsy ary mandrendrika ny maro an’isa.