Fitaovana amin’ny fampieleza-kevitra?

18/12/2012

Handray karama isam-bolana, manomboka ny volana janoary 2013 ho avy izao ireo mpilalao ao amin’ny Makis de Madagascar. Izany hono, dia mba ho valisoa omena noho ny naha tompondaka azy ireo nandritra ny fiadiana ny ho tompondakan’i Afrika, vondrona B amin’ny taranja “rugby à 15”, izay natao teto amintsika farany teo, ka naha tompondaka ny Makis de Madagascar. Raha ny fahalalàna ny zava-misy dia tsy mbola nisy fitondram-panjakana nanome karàma mivantana ny mpanao fanatanjahan-tena izany. Tsy fanao izany.Azon’ny fanjakana atao ihany ny mampiditra mpiasa raha misy ilàna izany.

Saingy mipetraka eto ny fanontaniana : misy asa mety ilàna ny mpilalaon’ny Makis ve ka mahatonga an’i Andry Rajoelina hampiditra azy ireo ho isan’ny olona karamain’ny fanjakana isam-bolana ? Ny andraikitry ny fitondram-panjakana, amin’ny sehatra iray, eo amin’ny lafiny ara-panatanjahatena ohatra, dia ny manatsara ny tontolon’ny mpilalao, mba hampakatra ny vokatra mety ho azo. Mazàva ho azy fa ny andraikitry ny fanjakana dia tokony hijanona hatreo. Raha misy fanomezana tombony ankoatra izay dia efa zavatra hafa, efa misy tetika politika ho amin’ny fifidianana. Iaraha-mahalala rahateo fa ny “ambany tanàna” no tena mandrafitra ny ankamaroan’ireo mpilalao baolina lavanava ireo. Ary tsy takona afenina ny hamaroan’izy ireo. Miandry valiny avy amin’ireo Makis ireo ny filoha, raha nanao iny fanapaha-kevitra iny. Alai-panahy, arak’ izany ny saina hihevitra fa ho lasa fitaovana politika sy mpanao propagandin-dRajoelina fotsiny ihany ny Makis.
Sokajin’olona mora tarihina ny vahoaka eny ambany tanàna. Raha vao nanomboka ny tolony I Rajoelina tamin’ny volana janoary, taona 2009, dia ireo ambany tanàna no nentaniny hanamafy sy hanatevina nyhetsika. Iaraha-mahalala anefa izao fa izy ireo no tena mitondra faisana amin’ny fidangan’ny vidim-piainana. Koa dia tetika hafa amin’ny alalan’ny Makis indray no hisarihina ny fon’ny ambany tanàna.
Maro koa ireo fanontaniana mety hipetraka, raha tanteraka izao fanomezana karàma isam-bolana ny Makis izao : Ahoana ny mikasika ny fifanarahana arak’asa misy amin’izy ireo sy ny fanjakana ? Ahoana ny momba ny fisotroan-drononony ? Raha misy ny tsy fahafahan’ny mpilalao manohy “ny asany”, ho tapaka ve ny karamany, satria tokoa ny karama dia tambin’ny asa atao ? Ary farany, eo amin’ny sokajy fahafiry eo amin’ny mari-karama no mety ametrahana ny karaman’ny Makis ?
Manoloana iny fanapahan-kevitry ny filohan’ny tetezamita iny, dia lasa ihany koa ny saina, ny amin’ny maha laharam-pahamehana ny zavatra iray. Tena ilaina maika ve ny hanomezana karama isam-bolana ny Makis ? Tsy vitsy, raha tsiahivina, ireo fitakiana mbola tsy nahitam-baliny hatramin’izao, eto Madagasikara. Anisan’izany, ny tokony andoavana ara-dalàna ny vatsimpianaran’ny mpianatra. Eo indrindra dia marihina fa vatsimpianarana 2 volana no hany voarain’ny mpianatra hatramin’izao, kanefa ny tokony ho izy dia vatsimpianarana isam-bolana, mandritra ny fotoam-pianarana.
Eo koa ny fitakian’ny Sempama, ny Seces, ny Mpiraiki-draharaha ao amin’ny fitsarana sy ireo mpiandry fonja. Angamba tsy laharam-pahamehana noho ny karama ho an’ny Makis , ireny fitakiana ireny.
Koa na nianatra sy nikaroka nandritra ny taona maro aza ianao, rehefa heverina fa tsy ho lasa mpanohana amin’ny ny fifidianana, dia tsy voajery ny momba anao sy ireo mety ho fitakiana.