Mitaky ny mangarahara ireo tomponandraikitra

18/12/2012

Namoaka fanambarana ireo tomponandraikitra ambony sy avy amin’ireo sehatra rehetra eny amin’ny Anjerimanontolo. Tamin’izany fanambarana izany no nanehoan’izy ireo ny fitakiana ny mangarahana mahakasika ny teti-bola homena ny Oniversité. Mitaky ny hanaovana laharam-pahamehana ny Fampianarana ambony sy ny Fikarohana ara-tsiansa amin’ny tetim-pivoaram-pirenena ihany koa izy ireo. Lesoka maro no notanisain’ny fanambarana avy amin’ireo tompon’andrikitra ambony ao amin’ny Oniversiten’Antananarivo izay namoaka Fanambarana ny 14 desambra lasa teo.

Fanambarana izay nosoniavin’ny Filohan’ny Oniversiten’Antananarivo, ny solontenan’ny Filohan’ny Toeram-pampianarana Fito, ny solontenan’ny Mpampianatra mpikaroka, ny solontenan’ny Mpikaroka mpampianatra ary ny filohan’ny SECES. Isan’izany lesoka eo amin’ny fampandehanana araka ny tokony ho izy ny raharaham-pampianarana izany ny tsy fazoana ara-potoana ny vola hampandehanana ny Oniversité sy ny karaman’ireo mpandraharaha ary ny vatsim-pianaran’ny mpianatra. Eo ihany koa ny fanaovana an-kilabao ny Oniversiten’Antananarivo amin’ny tsy fandoavana ora fanampiny. Voakiasy ho isan’ny lesoka ihany koa ny tsy fanajana ny « franchise universitaire » sy ny tsy fanatanterahana ny fangatahan’ny SECES.
Eo anatrehan’ireo rehetra ireo dia naneho ny fitakiany amin’ny fitondram-panjakana sy ireo tompon’andrikitra isan-tsokajiny eto amin’ny firenena ny fanambaran’ireo tomponandrikitra ambony ao amin’ny oniversiten’Antananarivo. Mitaky ny hanaovana ho laharam-pahamehana ao amin’ny tetim-pivoaram-pirenena ny Fampianarana ambony sy ny Fikarohana ara-tsiansa arak’izany izy ireo. Mitaky ihany koa ny hitandrovana hatrany ny hasin’ny Oniversitem-panjakana. Ary farany dia isan’ny fitakian’izy ireo ihany koa ny hisian’ny mangarahara avy amin’ny ministeran’ny Fampianarana ambony sy ny Fikarohana ara-tsiansa, sy ny ministeran’ny Vola sy ny Teti-bola ihany koa izy ireo. Atao ampy, fantatra mialoha, ary voantsinjara ara-potoana ny vola natokana ho an’ny oniversité, araka izany fitakiana izany.
Marihina fa tsy nahitana endrika fandrahonana fitokonana toy ny mahazatra ity fanambarana nataon’ireo tompon’andrikitra ambony eny anivon’ny Anjerimanontolo eto Antananarivo ireto.