Lasibatra Antananarivo sy ny manodidina

19/12/2012

Avy amin’ireo tanana eo ho eo amin’ny 80 km manodidina an’Antananarivo ireo olona folo farany voaporofo fa voan’ny pesta teto amintsika. Mahatratra 250 kosa ireo olona voan’ny pesta nandritra ny taona 2012 ary ny 90 tamin’ireo dia nandritra ny volana oktobra no mankaty no nidiran’ny haretina taminy. Ny fanambarana nataon’ny masoivohon’ny Sampandraharahan’ny Firenena Mikambana momba ny Fahasalamana eto Madagasikara no nahafantarana an’ireo rehetra ireo. Tsy mbola namoaka vaovao manandrify izany kosa ny tompon’andrikitry ny Fahasalamam-bahoaka eto amintsika.

Raha ny krizy politika sy ny vokatr’izany eo amin’ny fiainam-bahoaka no tena mampalaza ny firenentsika amin’izao fotoana izao, dia tsy isalasalana ihany koa fa taorian’ny tatitra nataon’ny masoivohon’ny Sampandraharahan’ny Firenena Mikambana momba ny Fahasalamana eto amintsika, na ny OMS, dia halaza nohon’ny tsy fifehezana ny firongatr’ireo areti-mandoza isan-karazany i Madagasikara. Ny firenentsika no voalaza fa firenena mbola ahitana ny aretina pesta maneran-tany, an-koatra an’i Repoblika Demokratikan’i Congo. Raha araka ny nambaran’i Céline Seignon-Kandissounon, solontena maharitry ny OMS eto Madagasikara, izay nitafa tamina mpanao gazety, dia tanana manodidina an’Antananarivo no nahitana ireo olona 10 farany fantatra fa voan’ny Pesta. Izany hoe tanana eo ho eo amin’ny 80 km tsy lavitra an’Antananarivo. Mbola ity masoivoho ity ihany koa no nitatitra fa nahatratra 250 ny isan’ny olona voan’ny pesta teto Madagasikara nandritra ny taona 2012. Ny 90 tamin’izy ireo dia nandritra ny volana oktobra no mankaty no nazoany izany aretina izany. Ankoatr’izay dia isan’ny nanaitra tamin’ny fanambaran’ity solontena maharitry ny OMS ity ihany koa ny filazana fa ny iray amin’ireo olona dimy tratran’ny pesta nandritra ny taona 2012 dia matin’izany haretina izany avokoa. Nanamarika ny tenany fa raha oharina tamin’ny taon-dasa dia vitsivitsy kokoa ny isan’ny olona tratran’ny pesta teto Madagasikara saingy mafimafy kokoa ny trangan’aretina, ary maro kokoa tahan’ny fahafatesana raha oharina ny tamin’ny taon-dasa. Nanambara ihany koa i Céline Seignon-Kandissounon fa mbola misy toerana maro ahitana ny trangan’aretina amin’izao fotoana izao eto Antananarivo sy ny manodidina ary ahiana hiparitaka haingana izany nohon’ny fahatongavan’ny fotoam-pahavaratra.
Ankoatry ny fampahafantarana ny zava-misy momba izay firongatry ny pesta eto Antananarivo sy ny manodidina azy izay, dia isan’ny nasongadin’ity masoivohon’ny OMS eto Madagasikara ity ihany koa ny maha “aretina mahamenatra” ny pesta. Nambarany fa ny tsy fahampian’ny fizaham-pasalamana eto amintsika no tena rangory fototry ny afo mahatonga izao firongatr’ity haretina ity izao. Ankoatr’izay dia ny fahantrana vokatry ny krizy mianjady amin’ny firenena no nambaran’ity vahiny ity fa iray amin’ireo antony tena mampirongatra an’ity haretina ity.
Loza mitatao ho an’ny firenentsika arak’ireo rehetra ireo ny firongatry ny pesta amin’izao fotoana izao. Mahagaga anefa fa ny vahiny indray ity no manao fanambarana mampahafantatra an’izao tontolo izao ny fisian’izany loza mitatao izany. Hatramin’izao dia tsy mbola re ny fisian’ny fampahalalana avy amin’ny fitondram-panjakana ny fisian’izany, indrindra fa ny andraikitra raisiny manoloana an’izany loza efa mihantra izany.