Nahazo fihofanana ny zandary tao amin’ny ELI

21/12/2012

Niatrika ny fihofanana andiany fahatelo sady farany izay natokana ho azy ireo, ireo zandary ao anatin’ilay vondrona fantatra amin’ny anarana hoe ELI na Equipe légère d’intervention ao amin’ny Groupement an’ny Zandary Faritra Antsinanana. Fanazaran-tena amin’ny fitifirana sy ny fiatrehana jiolahy mitam-piadiana no nanamarika ity fihofanana andiany fahatelo ity. Tao Tanambao Nosibe, Toamasina II no nanatanterahana izany fanazara-tena miendrika fanofanana ireo zandrarin’ny ELI izany. Nambaran’ny nambaran’ny GP2 Ramaroson Onjaniaina mpitondran-tenin’ireo mpampihofana telo mirahalahy izay avy amin’ny MIT (Moniteur d’Intervention Professionnel) eo anivon’ny vondrona GSIS Antananarivo, fa efa afaka mihatrika ny andian-jiolahy sy ny fametrahana filaminana maharitra eto Toamasina ireto andiana zandary nofaninay ireto. Iarahana mahita izao fa efa mitovy fitaovana sy mitovy tetika ary mitovy paik’ady aminay mpitandro ny filaminana ny jiolahy ankehitriny, ka ilaina hatrany ny fanamafisana ny traikefanay mba hisy ny fitokisan’ny mponina amin’ny mpiaro anay ny vahoaka sy ny fananany ary tena ho an’ny tanindrazana.

Araka ny fanazavan’ny Kly Bototsara Nathanaël James lehiben’ny “groupement” ny zandarimariam-pirenena faritra atsinanana sy mpandrindra ny E.L.I dia “natsangana ity vondrona ity ELI ity noho ny fahatsapanay ny firongatran’ny asan-jiolahy mahery vaika sy ny fampiasan’ny jiolahy fitaovam-piadiana raitra mitovy aminay. Efa nomanina amin’ny fihatrehana ireto vondrona ELI Toamasina ireto, na ara-toe-batana, na ara-moraly, mba tena hisy ny vokatra mivantana amin’ny fametrahana ny fandriampalemana maharitra”.

Nomarihin’ireo mpampihofana tamin’izao fampihofanana izao fa ny fakana an-keriny, ny famakiana banky, ny fanafihana mitam-piadiana mahery vaika no tana nahazo vahana tany Toamasina tato ho ato. Ankoatra izay azo itarafana ny firongatry ny fanafihana mitam-piadiana tany amin’ity faritra ity ihany koa ny fahatratrarana basy kalaky dimy fampiasan’ny mpitandro ny filaminana sy basy PA am-polony mbola fampiasan’ny mpitandro ny filaminana ihany ary vita gasy ny sasany.

Miisa 18 mirahalahy ireto zandary nofanina ireto, izay notsongaina teo anivon’ny “groupement” atsinanana sy ireo kompania ary ireo brigady mandrafitra azy. Ny Kly Randriamanantena Pascal sy Komanda Tovonandrasana no talen’ny ELI Toamasina; Lietna Randriampanjato Paul Noël sy Lietna Zafitsiry no mpitarika izany.