Olona 12 nosolokiany 210 tapitrisa iraimbilanja

22/12/2012

Fitoriana am-polony no tonga tao amin’ny “brigade criminelle” Anosy, mahakasika asa fisolokiana mihoatra ny 210 tapitrisa iraimbilanja nataon’izany ramatoa iray antsoina hoe Olivia izany. Mitonona ho mahavita mikarakara “visa” ho any Lafrantsa ao amin’ny ambasady frantsay ity ramatoa ity ka mitentina 17,5 tapitrisa isan’olona ny vola ilaina amin’izany. Efa ao anatin’izany vola izany ny vidin’ny tapakilan’ny fiaramanidina. Olona miisa 12 aloha izao no efa fantatra fa voasolokiny ary efa nametraka fitoriana. Nambaran’ity Olivia ity tamin’ireto olona ireto fa fomba roa no atao amin’izany: na fifanarahana ara-diplômatika na fitsangatsanganana (tourisme). Ireo fomba roa ireo no nentin’ity ramatoa ity nandresy lahatra ireto mpitory ireto. 12 no isan’ny toerana amin’ireo fomba roa ireo, hoy hatrany ity antsoina hoe Olivia ity.

Voasoketa tao anatin’izany ihany koa ny ministeran’ny Raharaham-bahiny. Milaza ho tànan-kavanan’ny minisitra sy ny fianakaviany ny tenany; lainga sy paikady nentina nandrebirebena avokoa anefa izany. Tsy vitan’izany fa nasain’ity Olivia ity nanao fety ho fanaovam-beloma ireto olona 12 nosolokiany ireto ary nisy fotoana aza nanatrehany izany “pot d’adieu” izany. Efa ho roa na telo volana teo ho eo izay no nitrangan’izao asa fisolokiana izao ary tsy hita popoka izay misy azy amin’izao. Vehivavy iray mpiaraka matetika aminy sady mpampian-trano azyt antsoina hoe Mitou izany no fantatra fa notànana am-ponja vonjy maika eny Antanimora. Teny Ambohidratrimo teny no nisy ny trano fonenany. Niala tany izy araka ny vaovao re ary nifindra teny Mandroseza, tsy lavitry ny « station Shell ». Nambaran’ny tamin’ireto olona mitory azy ireo fa an’ny ministeran’ny Raharaham-bahiny ny finday fampiasany na ny antsoina hoe “flotte”. Indraindray tokoa, araka ny nambaran’ny mpitory, dia tena lehilahy izao no mamaly ny antso ary izay mihitsy no naharesy lahatra azy ireo. Efa lasa lavitra moa ity raharaha ity amin’izao fotoana ; amin’ny faha-13 febroary 2013 ho avy izao no handeha ny fitsarana ; mbola mitohy kosa ny fikarohana an’i Olivia. Izao anefa ny fanontaniana mipetraka : manana « accès » ao amin’ny ambasady frantsay tokoa ve ity ramatoa ity? Nahoana hoy ireo mpitory no nahafantarany fa efa nanao fangatahana “visa” tany aloha tany ny iray tamin’izy ireo saingy nolavin’ny ambasady frantsay!