Nesorina ireo fiarakodia miisa 30

22/12/2012

Niroso tamin’ny fanesorana an’ireo fiarakodia mbola niantsona teo amin’ilay tokotany ifanolanany amin’ny Fikambanana Tsara Ambina ny Seimad, omaly tokony ho tamin’ny 10 ora maraina. Ny Vaditany niaraka tamin’ireo mpitandro filaminana avy amin’ny Emmo-reg no nanatontosa ny fanesorana an’ireo fiara teo amin’ity toerana ao amin’ny 67 Ha ity omaly. Tsy afa-nanao n’inon’inona arak’izany ireo mpikambana ao amin’ny fikambanana Tsara Ambina izay mpifanandrina amin’ny Seimad amin’ity raharaha ity. Nambaran’ny filohan’izany fikambanana izany, Rajoaharison Felix fa tsy nisy na dia fifanantonana aza teo amin’izy ireo sy ny Seimad tamin’ny fanatanterahana an’ity fanesorana azy ireo tamin’ny tany ity.

Manahy mafy ny amin’ny tsy maha-ara-dàlana ilay taratasy teny am-pela-tanan’ny Vaditany izay mandidy azy ireo hiala amin’io toerana io ihany koa ireo mpikabana ao amin’ny fikambanana Tsara Ambina. Nambarany fa tsy mbola notsaraina akory ity raharaha ity kenefa efa misy fanampahan-kevitry ny fitsarana sahady. Rah any mahazatra, hoy ny fanazavan’izy ireo, dia tsy amin’ny raharaha ady tany toy izao no tokony hamoahan’ny Fitsarana fanampahan-kevitra mitovy an’izao. Nomarihan’izy ireo ihany koa fa ny alakamisy hariva vao azon’izy ireo ny taratasy milaza ny fanampahan-kevitra avy amin’ny fitsarana. Vokatr’izany tsy nanam-potoana nanaovana fanoherana akory izy ireo.
Tsiahivina fa ny Alakamisy teo no niakatra fitsarana ny raharaha nitorian’ny Seimad ny filohan’ny Fikambanana Tsara Ambina, izay voapanga ho nanimba ny fananan’ny Seimad ary nadrahona ho faty ny mpiasa tao amin’ity orin’asa ity. Andrasana amin’ny alakamisy ho avy izao ny vokatr’izany fitsarana izany.
Tsara ny mampatsiahy fa ny fakan’ny Seimad an’ity tany ity izay efa nampiasain’ny Fikambanana Tsara Ambina hatry ny ela no fototry ny disadisa eo amin’ny roa tonta. Hanamboarana biraon’ny Seimad no vaoalaza fa antony hakany ny tany, izay misoratra amin’ity orinasa ity, araka ny fanamarihana. Mitaky ny hisian’ny fifampidinihana mba ahitana marimaritra iraisana manoloana an’izany fandroahana azy ireo amin’ity toerana ity kosa ireo mpikambana ao amin’ny fikamabanana Tsara Ambina.