Izay vao tena tapa-kevitra

22/12/2012

Nandritra ny fanambarana izay nataon’ny tonian’ny FFKM omaly teny Ambatovinaky no nampahafantarana fa hirotsaka amin’ny fampihavanana amin’izay ity rafitra ity. Hatomnoka amin’ny fotoam-pivavahana izay hatao amin’ny faritany FFKM rehetra manerana ny Nosy izany asa fampihavanana izany. Eo ihany koa ny fivoriana iarahana amin’ny filoham-piangonana efa-dahy sy ireo mpitarika ny fiangonana hafa ary ny rafitra nentim-paharazana ary ny mpiara-miombon’nantoka aminy. Tsy hitazam-potsiny ny fahavoazan’ny firenena noho izao krizy izao intsony ny FFKM.

Izay no azo amintinana ny fanambarana izay nataon’ny Tonian’ny FFKM, ny Pastora Randrianirina Solofoson Gilbert, izay nitarika ny valan-dresaka ho an’ny mpanao gazety omaly teny Ambatovinaky. Taorian’ireo antso avo nataon’ireo mpanao politika maro sy ny fidradradradran’ny vahoaka maro manerana ny Nosy no nanapahan’ny FFKM handray an-tanana amin’izay ny fampihavanana ny Malagasy, raha araka ny nomarihan’ny tonian’ity rafitra iombonan’ny fiangonana Kristianina ity. Fantatra tamin’ity valan-dresaka ho an’ny mpanao gazety ity ary fa hanomboka amin’ny alalan’ny fotoam-pivavahana izay hatao amin’ireo faritany FFKM rehetra manerana ny Nosy izany asa fampihavanana izany. Ny 23 desambra izao no hatao zany fotoam-pivavahana izany, ka ny eto Antananarivo dia hatao ao amin’ny Fiangonana Loterana Ambatovinaky, amin’ny telo ora tolakandro. Manarak’izany dia hanamarika ny fanaombohana an’ity asa fampihavanana ity ihany koa ny fivoriana ho tarihan’ireo filoham-piangonana efa-dahy ao amin’ny FFKM ary iarahany amin’ireo mpitondra ny fiangonana hafa toy ny silamo ary ny tompon’andraikitra ara-drazana toy ny Tangalamena. Ny 29 desambra no hanaovana izany fihaonana voalohany izany, araka ny nambaran’ny Tonian’ny FFKM.
Tsara ny manamarika fa efa nahazo tso-drano avy amin’ny birao foiben’ny FFKM izao asa fampihavanana hataon’izy ireo izao. Nandritra ny fivoriamben’ny komity foibe tamin’ny 25 novambra no nandraisana ity fanampahan-kevitra ity ary nazoany ihany koa izany tso-drano izany. Hatramin’io fotoana io ka hatramin’izao dia intelo ny FFKM no nikasa hanomboka an’izao asa fampihavanana izao saingy nisy olana hatrany izay. Nomarihan’ny Tonian’ny FFKM ihany koa fa tsy olana hatreto ny enti-manana ahafahana manatanteraka an-tsakany sy an-davany izany asa fampihavanana izany.
Efa tongotra mby an-dakana arak’izany ny FFKM amin’ny firotsahana hampihavana ny Malagasy. Tsy mahasakana ny ahiahin’ny maro ny amin’izay mety ho vakatr’izany hetsika izany anefa ny fanehoan’ny FFKM ny fahavononany. Tsy sambany manko no hirotsahan’izy ireo amin’izany asa fampihavanana izany, indrindra tamin’izao krizy lalovan’ny firenena izao. Iaraha-mahalala anefa fa tsy naharesy lahatra ny maro, hatreto ny vokatr’izany asa fanelanelanana izany. Ankoatr’izay, isan’ny hametrahan’ny maro fanontaniana ihany koa ny mikasika ny dingana efa vita indrinra ny fampiharana ny tondrozotra sy ny firosoana amin’ny dingan’ny fifidianana amin’izao fotoana izao. Na izany na tsy izany, tsy vitsy ihany koa ireo izay miandrandra vokatra amin’izany firotsahan’ny FFKM hanao indray ny fanelanelanana izany.