Haka ny fananan-dRavalomanana ny AV7

26/12/2012

Mihazakzaka izay tsy izy ny toe-draharaham-pirenena, taorian’ny fanapahan-kevitry ny SADC izay misakana ny filatsahan-kofidian’ny filoha teo aloha Marc Ravalomanana sy ny filohan’ny Tetezamita Andry Rajoelina. Naneho ny fankasitrahany izany fanapahan-kevitra izay avy hatrany ny filoha teo aloha, fanapahan-kevitra iombonan’ny SADC amin’ny fianakaviambe iraisam-pirenena; raha mbola mikiry mafy amin’ny heviny kosa ny filoha Rajoelina. Nanao tohy vakana ny fanehoan-kevitra avy amin’ireo ankolafy politika, indrindra ny avy ao Ambohotsorohitra sy ny manodidina azy. Isan’izany ny fikambanana AV7.

Onitra
Mandray vola isam-bolana amin’ny fitondrana Tetezamita ireo olona naratra sy mitondra takaitra nandritra ny raharaha 7 febroary 2009; fanapahan-kevitra noraisin’Ambohotsorohitra samy irery hilazana amin’ireo niharam-boina fa tsy tompon’antoka tamin’izao fahavoazana nanjo azy ireo izao velively ny filoha Rajoelina sy ny manodidina azy. Lasa fitaovana eo am-pelatanan’ny mpitondra ny fikambanana AV7 ary ampiasaina amin’ny lafiny rehetra mihitsy. Nitafa tamin’ny TV5Monde ny sekretera jeneralin’ny fikambanana AV7, Eléonore Ralalanirina ary nanambara fa mitaky ny fanagiazana ny fananan-dRavalomanana Marc izy ireo hanonerana ny onitra nateraky ny fahavoazana nahazo azy ireo. Ny Fitsarana irery no afaka mametra ny onitra ary izay indrindra no mahavariana amin’ity raharaha 7 febroary 2009 ity. Ny fanjakana HAT no avy hatrany dia nisolo toerana ny Fitsarana tamin’ny alalan’ny fanomezana vola isam-bolana izay miendrika onitra kanefa tsy nanaja ny lamina sy ny paikady takian’ny fitantanam-bolam-panjakana. Maro ihany koa no mihevitra fa nandeha ila iny fitsarana ny raharaha 7 febroary 20029 iny. Asa an-terivozona 20 taona no miandry izay rehetra mananika lapam-panjakana araka ny voalazan’ny fehezan-dalana famaizana; tomponandraikitra feno amin’ny zava-mitranga ihany koa izay rehetra mitarika olona hidina an-dalambe, araka ny fanambarana fanaon’ireo tomponandraikitra eo anivon’ny Emmo nandritra izay efa-taona nisian’ny Tetezamita izay.
Air Force One II
Mety ho diso paika ihany ny fikambanana AV7 amin’izao fanirian’izy ireo izao. Efa lasan’Ambohitsorohitra ny vola be tamin’ny alalan’ny famarotana ny fiaramanidina Air Force One II. Mba hoatrinona tamin’izany no nomen’ny mpitondra ireo mpikambana ao amin’ny AV7? Tsy misy afatsy ny trano etsy Faravohitra no hany fananan’ny filoha teo aloha mitsangana eto an-drenivohitra. Izay indrindra no hilazana fa ataon’ny mpitondra fitaovana hiarovany ny tombotsoany ity fikambanana iray ity. Mananontanona tokoa mantsy ny fodian’ny filoha teo aloha ka dia ny trano fonenany indray izany izao no hitadiavana fomba hanagiazana azy, ankoatra ny fiampangana nataon’ny filoha Rajoelina azy ho nikotrika fanonganam-panjakana in-telo nisesy nanomboka ny taona 2009. Mahazo manao izay tiany (mandika lalàna) tokoa ity AV7 ity rehefa hitondra tombotsoa ho an’ny HAT. Ohatra amin’izany ireny “discours de Talion” nataon’izy ireo teny Ivato ireny, endriky ny tsy fisian’ny tany tan-dalana mandritra izao fitondran-dRajoelina izao.