Nosakanana tsy hanao fanelanelanana ?

26/12/2012

Tsy vitsy ireo izay nanome tsiny ny FFKM noho ny tsy fandraisany andraikitra nandritra ny volana maro, manoloana ny fitarazoan’ny kirizy mianjady amin’ny firenena. Nanazava ny antony tsy nahafahany niroso araka ny tokony ho izy tamin’izany asa fanelanelanana izany. Nandritra ny fiaraha-mivavaka nentina nanombohana ny fanelanelanan’ny FFKM ho famahana ny krizy eto Madagasikara, no nanambaran’ireo mpitarika ny fotoana fa nosakanana tsy hanao izany izy ireo nandritra ireny fotoana ireny. Izay vao tena mazava ny resaka. Tsy noho ny sitra-pon’ireo Filoham-piangonana mivondrona ao amin’ny FFKM akory no tsy nahafahany nanao hatramin’ny farany ny fanelanelanana hivoahan’i Madagasikara amin’ny Krizy.

“Nosakanana tsy hanao fanelanelanana izahay nandritra izay fotoana izay satria araka ny hevitr’ireo mpanao politika dia olana politika no nisy teto Madagasikara ka ny mpanao politika ihany no mahita vaha-olana amin’izany”, hoy ny iray tamin’ireo mpitondra fivavahana avy ao amin’ny SEFIP izay sampan’ny FFKM nitarika ny fotoam-pivavahana ny faran’ny herinandro teo, tao amin’ny Fiangonana Ambatovinaky. Fa mba iza kosa ary ireo mpanao politika na vondrona na hery velona eto amin’ny firenena izay nisakana ny FFKM tsy hiroso amin’izany fanelanelanana izany? Raha avadika ny fanontaniana dia hoe: iza no mahazo tombontsoa amin’ny tsy fisian’izany fanelanelanana izany, izany hoe fijanonan’ny firenena ao anatin’izao krizy izao? Mazava loatra fa any amin’ireo mpitondra ny tetezamita amin’izao fotoana izao no andehan’ny saina aman-eritreritra satria tsy misy afa-tsy izy ireo no mahazo tombon-tsoa amin’izany. Izy ireo ihany koa no manana ny hery nahafahana nandrara ny FFKM tsy hiroso amin’izany fanelanelanana izany. Tsy mahagaga ary raha tsy tafavoaka amin’ny krizy hatramin’izao i Madagasikara na dia efa efa-taona aza no nikaroham-bahaolana amin’izany. Porofo ihany koa izany fa sarintsarina famahana olana avokoa izay natao teto hatramin’izay.
Tsara ny manamarika fa nandritra ny fotoam-pivavahana tamin’ny faran’ny herinandro teo no nanambaran’ny FFKM fa vonona ny hiroso amin’ny asa fampihavanana tanteraka izy ireo amin’izao fotoana izao. Rahampitso alakamisy no hanombohan’ny hetsika rehetra manandrify izany. Mahatratra 173 amin’izao fotoana izao ireo fikambanana na antoko politika izay efa nihaona tamin’ny FFKM ary efa nanaiky ny handray anjara amin’ity hetsika fampihavanana hataon’ny FFKM ity. Marihina fa efa hatramin’ny volana marsa no nanombohan’ny FFKM naka nyhevitr’ireo antoko na vondron’olona ireo mahakasika ny famahana ny krizy eto amintsika.