Miantso vonjy amin’ny vahoaka ny Foloalindahy ?

27/12/2012

Efa tazana eto Antananarivo, efa ho andro vitsivitsy izao, ny ankamaroan’ireo mpitandro filaminana nalefa hampandry tany sy hisambotra an-dRemenabila tany Betroka tamin’ny alalan’ilay hetsika fantatry ny maro amin’ny hoe “Tandroka”. Araka ny fantatra anefa dia mbola tsy nifarana ny iraka nampanaovina azy ireo tany amin’iny faritra atsimon’ny Nosy iny. Ny loharanom-baovao no nilaza fan oho ny tsy nazoan’izy ireo ny tambi-karamany no nahatonga azy ireo hiala tany an-toerana

Nitsoaka an-daharana sa midongy? Hatreto dia tsy misy fampitam-baovao ôfisialy mikasika ny fitohizan’ny hetsika “Tandroka” izay ataon’ny foloalindahy any amin’ny faritra atsimon’ny Nosy. Hetsika izay natao indrindra hamongorana ny firongatry ny asan-dahalo any amin’iny faritra iny ary indrindra hisamborana an-dRemenabila. Amin’izao fotoana izao anefa dia saika efa tazana eto an-drenivohitra avokoa ny an-kamaroan’ireo mpitandro filaminana izay nalefa tany an-toerana handray anjara amin’izany hetsika goavana izany. Raha nanontaniana ny iray tamin’izy ireo, izay nisafidy ny tsy ho tononina anarana dia nilaza fa efa niverina eto Antananarivo avokoa ireo miaramila sy zandary rehetra nalefa farany teo tany Betroka. Na ireo avy amin’ny RFI izany na ireo avy amin’ny RAL na koa ireo avy amin’ny RTS. Ity mpitandro filaminana ity ihany koa no nilaza fa mbola miandry ny handohavana ny tambi-karamany aloha ireo miaramila ireo izay vao hiverina any amin’ny nanirahana azy. Hatreto anefa dia mbola tsy voaloha izany tambin-karama izany.
Akaro ny moralin’ireo mpiantafika
Tsara ny manamarika fa nanoratra taratasy mikasika an’izany hetsika manokana “Tandroka” izany indrindra ny lehiben’ny Foloalindahy omaly. Taratasy izay miantefa amin’ny Filohan’ny tetezamita, sy ny Praiminisitra lehiben’ny Governemanta ary ireo Praiminisitra lefitra. Ny Sekreteram-panjakana miadidy ny Zandarmariam-pirenena, ny minisitry ny Atitany ary ny minisitry ny Fiarovana izay notondroina ho minisitry ny Foloalindahy tamin’ity taratasy ity (N°320/MFA/CAB).
Araka ny voalazan’izany taratasy izany dia mitaky ny hisian’ny fankaherezana an’ireo miaramila nalefa any nanatontosa ity iraka ity any atsimo izy ireo. Mitaky ny hanohanan’ny vahoaka ny hetsika atao any atsimo ihany koa ity taratasy ity. Mampatsiahy ihany koa fa mahatonga ny fahakivin’ireo miaramila ny fanakianana mivaivay izay voizina an-gazety mahakasika ny fihetsik’izy ireo amin’izany iraka nampanaovina azy ireo izany.
Tsy fantatra hatreto na misy ifandraisana amin’izao fahitana an’ireo miaramila tonga eto Antananarivo amin’izao fotoana izao ity taratasy ity na tsia. Raha izany tokoa no zava-misy dia tsy isalasalana ny milaza fa midongy tsy mety hanohy ny asany ireo miaramila ary angamba mety hiafara amin’ny fitokonana ihany koa izany ka manahy mafy ny amin’izany ireo mpanao Sonia an’ity taratasy ity. Na izany na tsy izany, fomba ahoana no hanohanan’ny vahoaka an’ireo foloalindahy, araka ity fangatahana ity, raha toa ka baomba mandatsa-dranomaso hatrany no hasetry azy ireo isaky ny misy fitakiana ataony?