Hamelona Jeneraly 31 indray ny mpandoa hetra

27/12/2012

Manamboninahitra miisa 31 indray no nakarina eo amin’ny laharana maha “Général de division” sy “Général de Brigade ». Nandritra ny Filankevitry ny minisitra izay notanterahina omaly no nanaovana izany fampiakarana grady izany. Miisa 18 ireo nakarina ho amin’ny gradin’ny “Général de Brigade”. Miisa 13 kosa ireo nakarina ho amin’ny Gradin’ny “Général de division”. Ny fampitam-baovao laharana faha 209-P.T/SGP/COM, avy amin’ny fiadidiana ny tetezamita no nampita izany vaovao izany.

Tsy isalasalana ny milaza fa mitodika any amin’ny fahafahan’ny firenena mizaka ny vesatra aterak’izany fanendrena manamboninahitra izany ny sain’ny mpanara-baovao, raha vantany vao nisy ity fampiakarana grady ity. Ny hetsika toy izao tokoa dia midika avy hatrany fa miakatra ny vola homena an’ireo manamboninahitra ireo.Torak’izany ihany koa ny tombon-tsoa isan-karazany ahafahany manatontosa ny asa nankinina taminy. Raha lazaina amin’ny teny hafa dia midika ihany koa izao fampakarana grady sy fampitomboana isa ireo manamboninahitra ambony izao fa hitombo ny vesatra eo an-tsoroky ny Fanjakana. Midika ihany koa izany fa mitombo ny vesatra takiana amin’ny vahoaka satria ny vahoaka, amin’ny alalan’ny hetra izay alohany no mandoha ny karaman’ireny manamboninahitra ireny. Izay rehetra izay no ahafahana milaza fa hamelona jeneraly miisa 31 vaovao indray, ankoatr’ireo efa am-perin’asa, ny vahoaka.
Tsara ny mampatsiahy fa nakarina ny tahan’ny fandoavan-ketra ho an’ity taona vaovao 2013 ity. Tafakatra hatramin’ny 11% ny tahan’izany fampakarana ny fandoavan-ketra izany, raha araka ny voalaza ao amin’ny lalana mifehy ny tetibolam-panjakana. Azo heverina arak’izany fa nohon’ny fisian’izao fampitomboina isa ny manamboninahitra ambony ao amin’ny tafika Malagasy izao no isan’ny anton’izany fampakarana ny vola alohan’ny mpandoha hetra izao.
Tsara ihany koa anefa etsy an-danin’izany ny mampatsiahy fa nitaky ny tsy handoha hetra ny miaramila. Nisy mihintsy ny hetsika izay nataon’izy ireo manandrify izany fitakiana ny tsy handoha hetra izany. Raha atao amin’ny teny hafa dia ho zogain’ny Vahoaka Malagasy irery ihany ity fampakarana ny isan’ny manamboninahitra ity. Tsetsetsetsa tsy aritra no hamatrehana etoana izao fanontaniana izao. Mba inona tokoa no mba vitan’ny miaramila sy ny foloalindahy ho an’i Madagasikara nandritra izay 52 nitsanganany izay. Raha lanjaina miaraka ny zava-bitany, etsy an-daniny, sy ny korontana nentiny teto amin’ny firenena, etsy an-kilany, moa hifandaja ve izany? Ankoatr’izay, rahoviana ny Foloalindahy vao mba tsy ho vesatra ho an’ny Firenena intsony? Hatreto tokoa dia vesatra ho an’i Madagasikara ny miaramila, ary izy no isan’ny handoavana vola be indrindra eto amintsika.