Jeneraly maro no manohana ny FFKM

27/12/2012

Androany no hihaona amin’ireo filoham-piangonana ao amin’ny FFKM ny mpikambana ao amin’ny SEFIP. Mazava loatra fa manodidina ny firosoana amin’ny asa fanelanelanana izay efa nambaran’izy ireo fa hatao manomboka izao no ho votoatin’izany fihaonana izany. Araka ny loharanom-baovao dia misy jeneraly am-perinasa maromaro efa nanantona ny FFKM ary nandroso hevitra sy nankato an’izao fandraisan’izy ireo andraikitra izao. Mitaky ny hisian’ny fifanarahana politika vaova, ary ny fampijanonana ny Tondrozotra ihany koa ny an-kamaroan’ireo antoko na vondrona handray anjara amin’ity fanelanelanan’ny FFKM ity

Mitodika any amin’ny FFKM avokoa ny fijerin’ny maro amin’izao fotoana izao, indrindra taorian’ilay fotoam-bavaka izay mariky ny fanombohan’ny firotsah’ity rafitra ity indray amin’ny fanelanelanana hikatsahana izay lalan-kombana amin’ny fivoahana amin’izao krizy lalina lalovan’ny firenena izao. Tsy vitan’ny mitazam-potsiny anefa ny mpanara-baovao fa mametram-panontaniana ny amin’izany mety ho vokatr’izany fanelanelanana izany ihany koa. Isan’ny fanontaniana apetraky ny rehetra ny hoe: hisy fifanarahana vaovao ve, sa tsy hisy, avy amin’izany fanelanelanana hataon’ny FFKM izany? Mbola ho tazonina ve ny « Feuille de route » sa hialana? Mbola fanontaniana apetraky ny maro ihany koa ny momba ireo rafitra efa misy amin’izao fotoana izao. Ho tazonina ve izy ireo sa hisy rafitra vaovao ? Ary farany dia ny firosoana amin’ny fifidianana izay tohanan’ny fianankaviambe iraisam-pirenena. Hisy ihany ve izany za tsy hisy ?
Ny loharanom-baovao avy ao amin’ny rafitry ny FFKM no nahafantarana fa mahatratra 173 amin’izao fotoana izao ireo antoko sy vondrona maro samihafa eto amintsika izay efa nanao sonia ary vonona ny handray anjara amin’ity fanelanelanana ataon’ny FFKM ity. Ny ankamaroan’ireo fikambanana sy antoko ireo, araka ny loharanom-baovao ihany, dia miandrandra ary mitaky ny hisian’ny fifanarahana vaovao avy amin’izany fanelanelanan’ny FFKM izany. Ny antony dia noho ny fahatsapana fa tsy nahitam-bokany teo amin’ny famoahana ny firenena tao anatin’ny krizy ny fifanarahana nosoniavina teny Ivato na ny Feuille de route. Na izany na tsy izany, fantatra ihany koa fa misy ireo antoko sy vondrona vitsivitsy izay mitaky ny amin’ny tokony mbola itazonana ny Tondrozotra. Isan’izany ny TGV sy ny PSDUM ary ny UDRC. Ho an’ireto antoko ireto dia tokony ho tazonina hatrany ireo fifanarahana sasantsasany tamin’ny Tondrozotra.
Mety hanahaka an’i Laurent Gbagbo
Ankoatr’izay dia fantatra ihany koa, araka ny loharanom-baovao ihany, fa manohana an’izao fanelanelanan’ny FFKM izao ihany koa ny manamboninahitra am-perinasa maro eto amintsika. Efa nisy, hoy ny vaovao, ireo jeneraly maromaro izay nanantona ny FFKM ary nilaza ny fanohanan’izy ireo an’ity fanelanelanana ity. Nanolotra ny soso-kevitra sy ny paik’ady avy amin’izy ireo ihany koa ireo manamboninahitra ireo, ary nilaza mazava tsara far aha sanatria ka tsy tonga amin’izay niheverana azy ny fanelanelanana ataon’ny FFKM dia ahina mafy ny hitrangan’ny raharaha toa izay najo ny filoha teo aloha tany Côte d’Ivoire Gbagbo ny eto amintsika. Iaraha-mahalala, hoy ihany ny loharanom-baovao ny tsy hevitry ny fianankaviambe iraisam-pirenena mikasika ny fifidianana hatao eto amintsika.
Marihina fa alohan’ny faran’ny volana janoary dia efa hisy ny dingana vita avy amin’ity fanelanelanana ataon’ny FFKM izao, raha araka ny vinavinan’ny SEFIP.