Mirongatra ary miova endrika ny halatra omby

27/12/2012

Ireo tanàna madinika tsy lavitra ny renivohitry ny Faritra Atsimo andrefana indray amin’izao fotoana izao no lasibatry ny halatr’omby. Mifanohitra amin’izay nitranga hatrizay kosa ny habetsahan’ny omby angalarin’ireo dahalo, satria raha ireo omby am-bala no tena lasibatra hatramin’izay dia ireo omby vitsivitsy mifatotra, na ireo ombin-tsarety indray no kendren’izy ireo amin’izao fotoana izao. Tokatrano maromaro ary no very omby ny faran’ny herinandro teo tany amin’ny fokontany Belemboka sy Androvakely any Toliara.

Omby miisa 12 no lasan’ny dahalo tao Belemboka Androvakely ny faran’ny herinandro teo. Tsy fianankaviana tokana fa maromaro no tompon’ireo omby ireo, ary toerana samihafa, mazava loatra no nangalan’ny dahalo azy ireo. Tsy isalasalana arak’izany ny milaza fa miova endrika indray amin’izao fotoana izao ny fomba fanafihan’ny dahalo any amin’iny faritra iny. Marihina fa araka ny loharanom-baovao dia miisa 15 eo ho eo ireo dahalo tonga nanafika tamin’io alina io tokony ho tamin’ny 10 ora tany ho any. Notetezin’izy ireo avokoa ny toerana misy omby mifatotra rehetra tao amin’izany tanana izany. Ireo omby nifatotra tamin’ny rojo vy ihany no tsy lasan’ireo dahalo ireo.
Niova endrika arak’izany ny asan-dahalo any amin’izany faritra izany. Tsy ireo dahalo manao andiany maro sy mangalatra omby am-bala intsony indray no fahita fa ireo izay manangona ny omby amina tanana na fianankaviana maromaro. Marihina fa amin’ny maha toerana tsy lavitra ny renivohitra an’ireo tanana lasibatra ireo dia mamatram-panontaniana ny amin’ny fandraisan’andraikitry ny mpitandro filaminana manoloana izany ny maro. Raha araka ny tokony ho izy dia tsy sarotra tahaka ny mitranga eny amin’ireny faritra lavitra ny renivohitra ireny ny fanenjehana ny dahalo. Tamin’ity zava-nitranga tany Belemboka ity anefa dia tsy mbola tratra mandrak’izao ireo izay nanao izany fanafihana izany.
Tsara ny mampatsiahy fa araka ny loharanom-baovao dia nihazo an’Andranohinaly sy Behompy ary nipaka hatrany Vatolatsaka ny dian’omby izay hitan’ny mpanaraka an’izany halatr’omby izany. Hitan’ny mpanara-dia teny an-dàlana ihany koa ny omby vavy iray isan’ireo nangalarin’ireto dahalo ireto saingy noho izany omby izany tsy afa-nanaraka ireo omby hafa dia nokapain’izy ireo ny tongony ary navelany teny an-dàlana.