Nivadika ho disadisa politika

28/12/2012

Omaly no voalaza fa halevina ilay mpampianatra izay maty vokatry ny ady teo aminy sy ilay “attaché parlementaire” tamin’ny herinandro lasa teo. Nandeha ihany koa ny resaka tao Mananjary fa mbola hanao fihetsiketsehana mitaky ny fanolorana an’ilay nahafaty an’ilay mpampianatra ny fokonolona any an-toerana ka isan’izany ny ben’ny tanàna. Mbola tsy nijanona teo arak’izany ity raharaha nahafatesana olona tany Mananjary ity, ary ny fidiran’ny ben’ny tànana amin’izany raharaha izany dia nahatonga ny maro hilaza fa lasa resaka politika indray ity raharaha ity amin’izao fotoana izao. Tsiahivina fa ny 20 desambra lasa teo no nitrangan’ity raharaha ity raha raikitra ny ady teo amin’ilay mpampianatra sy ilay attaché parlementaire.

Araka ny loharanom-baovao dia nisotrosotro teny amoron-dàlana ilay mpampianatra sy ny namany niaraka taminy tamin’io fotoana io. Handalo eo amin’ny toerana nipetrahan’izy ireo kosa ny fiara nentin’ilay attaché parlementaire, izay nandefa jiro mazava nangataka tamin’izy ireo mba hiala ahafahany mandeha. Tsy nanaiky niala teo amin’izany toerana izany ilay mpampianatra ka teo no niantombohan’ny fifamaliana izay niafara tamin’ny fifampikasian-tanana. Samy naratra izy roalahy nandritra izany fifandonana izany satria voa mafy teo amin’ny lohany ilay mpampianatra, ary voatsatoka antsy teo amin’ny tendany sy teo amin’ny kibony kosa ilay attaché parlementaire. Mazava loatra fa samy naiditra hôpitaly izy ireo, kanefa maty nandritra ny fitsaboana azy ilay mpampianatra. Mbola tsaboina ary mila fitsaboana amina hopitaly hafa kosa ilay attaché parlementaire.
Izany fahafatesan’ity mpampianatra sady raim-pianankaviana mananjanaka efatra izany no nahatonga ny fahatezaram-bahoaka tao Mananjary ka nahatonga ny fanapotehana ny commissariat tany an-toerana sy ny fandoran’ny fokonolona ny fiaran’ilay attaché parlementaire. May nodoran’ny fokonolona ihany koa ny tranon’ity farany sy ny tranon’ny anabaviny.