Mikatona avokoa ny 70%

29/12/2012

Isan’ireo sehatra nitondra faisana vokatry ny fisian’ny krizy eto amin’ny firenena hatramin’izay niakaran’ny Filoha Rajoelina teo amin’ny fitondrana izay ireo orinasa madinika sy salatsalany eo amin’ny sehatry ny tao-trano sy asa-làlana (BTP) manerana ny Nosy. Mikatona avokoa amin’izao fotoana izao ny 70% n’ireo orin’asa amin’ity sehatra ity amin’izao fotoana izao. Mitaky ny mba hijerena manokana azy ireo, toy izay natao tamin’ny mpitatitra an-drenivohitra ny FPME BTP izay federasiona ivondronan’ireo orinasa miantsehatra amin’ny lafiny tao-trano sy ny asa-làlana.

Madiva ho fongana tanteraka amin’izao fotoana izao ireo orinasa madinika miasa eo amin’ny sehatry ny tao-trano sy ny asa-làlana na ny BTP eto Madagasikara. Raha araka ny fanisana nataon’ny Federasiona ivondronan’ireo orin’asa amin’ity sokajin’asa ity, na ny FPME BTP, dia tapitra nikatona avokoa ny 70% n’izy ireo nandritra iny taona madiva hivalona iny. Ny krizy izay nateraky ny fanonganam-panjakana nisy teto amin’ny firenena no tondroin’ity fikambanana ity ho rangory fototry ny afo nahatonga izao fahavoazana goavana manjo azyb ireo izao. Araka ny nambaran’ny filohan’ity Federasiona FPME BTP ity dia isan’ny antony tsy nazoan’izy ireo asa mihintsy ny fisian’ny fepetra napetrak’ireo mpamatsy vola amin’ny fazoana asa. Fepetra izay manilika tanteraka ireo orin’asa madinika sy salantsalany eo amin’ity sehatra ity. Marihina ihany koa fa nohon’ny tsy fankatoavan’ny fianankaviabe iraisam-pirenena ny fitondrana tetezamita ka tsy nazoana famatsiam-bola momba ireo fotodrafitr’asa mahazatra dia tsy nisy mihintsy ny tolotr’asa ho an’ireny orinasa madinika sy salantsalany ireny hatramin’izany nisian’ny krizy izay. Izany hoe, tsy nisy ny fanamboaran-dàlana izay hany mba ahitan’izy ireny asa; tsy nisy ihany koa ny fanamboarana ireny fotodrafitrasa mahakasika ny fiainambahoaka ireny, toy ny tsena sy ny tobim-pahasalanana n any tiha-drano sy ny hafa ihany koa.
Ankoatr’izay dia isan’ny antony nahafaty ny ankamaroan’ny orinasa amin’ny sehatry ny tao-trano sy ny asa-làlana ihany koa ny falafosan’ny tolo-bidy azoana ireo asa kely hany mba nisy. Ety dia ety arak’izany ny fifaninanana ary ireo orin’asa vaventy hatrany no mahazo ireny tolotr’asa ireny.
Eo anatrehan’izany fahavoazana mianjady amin’ity dehatra ity izany dia nanao antso avo ny filohan’ny FPME BTP, Rasoloarisoa Henri Victor, ny mba hijerena manokana aazy ireo, toy izay natao tamin’ny sehatry ny fitaterana an-drenivohitra. “Tsy tokony hisy ny atao zanak’ikalahafa amin’ny fikatsahana vahaolana mba hialan’ny orin’asa amin’ny fasahiranana manjo azy”, hoy ny nambaran’ity mpandraharaha ity, omaly. Marihina fa vao tamin��ny 29 aogositra ny taona 2011 no nijoro ity fikambanana ity. Mihevitra ny hanao hetsika goavana izy ireo amin’ny volana janoary ho avy io mba hanairana ny fitondram-panjakana hikaroka vahaolana amin’ny fahavoazan’ity sehatra ity.