« Matahotra fifidianana Andry Rajoelina »

29/12/2012

Tondroin’ny Fikambanana VAMI (Vahoaka Miray) ho kajikajy politika hitadiavana izay hampandamoka ny firosoana amin’ny fifidianana ny tsy fanambaran-dRajoelina ny fanampahan-keviny manoloana izany fifidianana izany. Midika ho kajikajy hanitarana indray ny Tetezamita ihany koa izao fihetsiky ny Filohan’ny Tetezamita izao, araka ny fahitan’ny Filoha lefitry ny VAMI. Mitaky ny fanatanterahana fihaonana eo amin’ireo manam-panahy rehetra, sy ny tsy hamelana an-dRajoelina handray anjara amin’izany dinika izany izay ahafahana mamaha tanteraka an’ity krizy ity arak’izany ny fikambanana VAMI.Tsy vonona ny hanala an’i Madagasikara amin’izao krizy lalina manjo azy ireo ny Filohan’ny Tetezamita, raha araka ny fahitan’ny Filoha Lefitry ny fikambanana VAMI,

Rakotondrainibe Alphonse. Ny mifanohitra amin’izany hoy ihany ity mpanao politika ity no ataon-dRajoelina amin’izao fotoana izao; Tsy inona izany fa ny fitadiavana izay fomba rehetra tsy ahatanteraka ny fifidianana. Porofon’izany, hoy izy ny fisian’ny paik’ady amin’ny alalan’ny fizirizirin-dRajoelina tsy hilaza ny marina mikasika ny filatsahany na tsia amin’ny fifidianana filoham-pirenena. Marihina fa nilaza mazava ny fikambanana VAMI fa tsy maintsy hanapa-kevitra ny hiady hatramin’ny farany ny mba ahafahan-dRavalomanana milatsaka amin’ny fifidiana indray izy ireo raha toa ka mikiribiby hilatsaka amin’izany fifidianana izany i Rajoelina.
Mbola manaporofo ny fisian’izay paik’ady te-hiala amin’ny Tondrozotra ary te-hametraka tetezamita vaovao tsy iarahana amin’ny ankolafy hafa izay ihany koa, araka ny fahitan’ity mpanao politika ity, ny fisian’ireo fanenjehana samihafa mahazo ny Praiminisitra Omer beriziky amin’izao fotoana izao, indrindra ny fitakian’ny mpomba an-dRajoelina ny fialan’ny lehiben’ny Governemanta. Izany rehetra izany no ahafahana milaza fa mikaroka fatratra izay hialàna amin’ny fifanarahana voarakitry ny tondrozotra i Rajoelina sy ny mpomba azy. Raha lazaina amin’ny teny hafa, dia ny fikatsahana izay tsy hisian’ny fifidianana amin’ny alalan’ny fanesorana amin’ny toerany ny Praiminisitry ny fampiraisam-pirenena no paik’adin’izy ireo ka ahafahany manendry Praiminisitra vaovao izay tsy iarahana amin’ny akolafy hafa ary hanitarana indray ny tetezamita.
Arak’izany dia tsy azo inoana velively ny hisian’ny fivoahana amin’ny krizy raha mbola isan’ny mandray anjara feno amin’ny dinika na ny fifanarahana politika eto amin’ny firenena i Rajoelina sy ny mpomba azy, araka ny fahitan’ny filoha lefitry ny Fikambanana VAMI. Tokony hisy arak’izany ny fihaonamben’ireo izay kilasiana fa manam-panahy ka afaka mitondra vahaolana haingana manoloana an’izao tsy fahavononan’ny tetezamita hamarana ny krizy ireo. Tokony tsy hampandraisina anjara amin’izany fihaonana izany anefa ny filohan’ny tetezamita satria araka ny iaraha-mahita dia tsy hanao afa-tsy izay hampikatso ny sori-dàlana ivoahana amin’izany krizy izany ny tenany.
Ankoatr’ireo dia isan’ny fitakian’ny VAMI ihany koa ny hanaovana fanadihadiana sy hametrahana ny mangarahara mahakasika ny vola nanamboarana ireny fotodrafitrasa nataon’ny tetezamita ireny. Tsy maharesy lahatra hoy izy ireo ny fanazavana samihafa izay nataon’ny mpomba an-dRajoelina, indrindra ny filazana fa avy amin’ny vola azo tamin’ny nanomezana fazoan-dàlana hitrandraka harena an-kibon’ny tany teto Madagasikara ny Orinasa WISCO. Fampiasam-bola izay hita mibarobary fa tsy nandalo tamin’ny fankatoavan’ny parlemanta.