Misy sahady ny milaza fa tohanan-dRavalomanana

02/01/2013

Tany amin’iny faritr’i Fianarantsoa iny no nandrenesana nandritra ny famelabelaran-kevitra nataona filohan’Antoko politika iray izay milaza ny hirotsaka ho fidina amin’ny fifidianana Filoham-pirenena fa ny tenany no tohanan-dRavalomanana amin’izany fifidianana izany. Nambarany tamin’zany ihany koa fa ny hampody an-dRavalomanana eto Madagasikara no nifanekeny tamin’ny filoha teo aloha.

Tsy miraikiraiky tokoa ny mpanao politika. Efa mandeha sahady amin’izao fotoana izao ireo paik’ady hisintonana ireo olon-dRavalomanana any ifotony rehetra any. Santionany amin’izany izay nitranga tany amin’ny distrikan’i Fianarantsoa I nandritra ny fitsidiam-paritra nataona filohan’Antoko politika iray tany an-toerana. Mpikambana fahiny tamin’ny antokon’ny filoha teo aloha, ary mpikambana tao amin’ny birao politikan’ny antokon’ny fitondrana teo aloha ity mpanao politika ity saingy taorian’ny faharavan’ny fitondrana teo aloha dia nisafidy ny hanorina antoko ho an’ny tenany manokana izany mpanao politika izany ary isan’ny nitsikera fatratra ireo mpomba an-dRavalomanana. Mazava arak’izany fa tsy vaovao amin’ireo mpikambana fototra tao amin’ny antokon’ny filoha teo aloha ny tenany. Ireo mpikambana tao amin’izany antokon’ny Filoha teo aloha izany indrindra no isan’ny nasain’izany mpanao politika izany tamin’ny fanazan-kevitra izay nataony tany Fianarantsoa.
Nandritra izay fotoana izany ary no nanambaran’ity mpanao politika ity fa ny tenany no tohanan’ny filoha teo aloha amin’ny fifidianana filoham-pirenena. Mazava loatra fa niantso ireo mpikambana tao amin’ny atokon-dRavalomanana hanohana azy ny tenay.
Tsiahivina fa tsy vitsy amin’ireo mpanao politika noheverina fa ho kandida tohanan-dRavalomanana no efa nanambara fa tsy hilatsaka amin’ity fifidianana ho filoham-pirenena ity. Isan’izany ny filohan’ny kongresin’ny tetezamita izay mpitarika ny ankolafy Ravalomanana izay efa nilaza fa tsy isan’ny mihevitra ny hilatsaka ho filoham-pirenena.
Marihana ihany koa fa hatreto dia mbola tsy nanambara ny momba izay tohanany amin’ny fifidianana filoham-pirenena ny filoha te o aloha Ravalomanana. Na izany na tsy izany, tsapa arak’ity zava-nitranga tany Fianarantsoa ity fa ifandroritana amin’izao fotoana izao ny mpikambana fototra amin’ny ankolafy Ravalomanana sy ny antoko Tiako I Madagasikara.