“MAFY HO AN’NY FARITRA ATSINANANA NY TAONA 2012”

02/01/2013

“Taona tena mafy ho an’ny faritra atsinanana iny taona nivalona iny amin’ny ankapobeny. Vao niandoha mantsy ny taona dia efa ny faritra mena tamin’ny tsy filaminana noho ny firongatry ny fanafihana mitam-basy mahery vaika sy ny fakana an-kery nifanesy ny teto Toamasina tampon-tanana”, izay no nambaran’Atoa Alain Mahavimbina raha nitafa tamin’ny mpanao gazety sy nilaza ny fizotry ny tona 2012 nivalona iny ny tenany, tao amin’ny birao fiasany araben’ny fahaleovan-tena. Nomarihany anefa fa “nisy ny ezaka napetraka niarahan’ny mpitandro ny filaminana mitambatra sy ny faritra, dia niarahantsika nahita avy hatrany ny vokany, tamin’ny fahasamborana ireo jiolahy sy nahafaty ny sasany ary nahatrarana ireo basy mahery vaika sasany fampiasan’izy ireny”.

Raha mbola tsy nilamina anefa ny tsy filaminana, dia tonga nandravarava ny faritra atsinanana indrindra ny tao Mavam, Brickaville, Vatomandry, Mahanoro, Antanambao Manampontsy ary Marolambo, indray ny rivo-doza Giovanna ny volana; “maro ny foto-drafitrasa simba sy ny fambolena potika izay nahatonga ny olana sosialim-bahoaka goavana ho an’ny mponina vokatry ny tsy fahampiana ara-tsakafo. Nefa nandray andraikitra haingana ny fikambanana tsy miankina iraisam-pirenena sy ny teto an-toerana ary ny governemant, ka voavaha haingana ny olana ara-tsosialy sy ny fahasimbana tamin’ny foto-drafitrasa maro”, hoy hatrany ny lehiben’ny faritra atsinanana. Tsy adinon’Atoa Alain Mahavimbina koa anefa ny mikasika ny fitokonana tetsy sy teroa niainan’ny faritra iadidiany, izay nampisy fikorontanana tamin’ny fiaraha-monina; izay indrindra araka ny nambarany “nisian’ireo fisamborana, ka isan’izany ny raharaha barikadimy izay efa namoahan’ny fitsarana didy ireo mpianatra nihoam-pefy sy ny hetsika tsy misy miala aketo niany mbola miandry fitsarana”. “Teo amin’ny ara-bola koa dia nisedra olana ny faritra, saingy natao ny ezaka tamin’ny fitsitsiana sy ny fitantanana, dia voaloha avokoa ny trosa sy ny tambin-karaman’ny fokontany, ary vita avokoa ireo fanamby napetraka novatsian’ny faritra ara-bola” hoy hatrany ity lehiben’ny faritra atsinanana ity. Tsy vitany olana ihany anefa no nianan’ny faritra araka ny fanamarihany ihany satria “tamin’iny taona nivalona iny koa no nanombohan’ireo fanamboarana foto-drafitrasa maro teto Toamasina; ny lapan’ny tanana, ny hopitaly manaram-penitra, ary ny lalana an-tampon-tanana vitsivitsy. Teo koa ny fanatsarana ny lapan’ny tanana tao Vatomandry sy Mahanoro ary ny fahazoana Baka ho an’Andovoranto”. “Ny taona 2012 nivalona iny ihany koa, dia taona nisokafan’ny faritra tamin’ireo firenena sy faritra tany ivelany. Teo ny Fanaovana sonia fanamafisana fiaraha-miasa tamin’ireo Region frantsay mpiara-miombona antoka hatramin’izay tamin’ny faritra atsinanana; teo koa ny fisokafana tamin’i Colombie; ary teo indrindra ny fandraisana anjara tamin’ny fivorian’ny Chine-Afrique tany Beijing”. Isany nanamarika ny taona 2012 ihany koa ny ny fihodinan’ny orinasa ambatovy amin’izay sy ny fanondranana voalohany ny Nikela sy Kobalta, mahatonga an’i Madagasikara ho faharoa maneran-tany amin’ity vokatra harena ambanin’ny tany ity. Isany nambaran’ny Atoa Alain Mahavimbina ihany koa, satria fotoam-pifidianana ny taona vaovao 2013 araka ny daty efa napetraka ny taona 2012 ireny ny mikasika ny ho firotsahany na tsia amin’ny fifidianana izay ho lehiben’ny faritra atsinanana, nomarihany ary fa “tsy misy aloha olona afaka hanakana ny firotsahana na tsia. Nefa tsy azo raisina am-bolony izany”. “Tsy mbola fotoana hilazako ny ho firotsahako na tsia izao, aleo koa aloha hilamina tsara ny resaka politika sy ny datim-pifidianana izay mbola maha-be ady hevitra sy resa-be”, hoy hatrany Atoa Alain Mahavimbina namarana ny fanazavany.