Ilaharana ny « fitsaboana vintana »

03/01/2013

Mihasarotra ny raharaha eto Madagasikara noho ny antony ara-politika izay tsy ahitam-baholana nandritra ny telo taona angarangidina. Ny fahatrana dia mieli-patrana manerana ny tokatrano malagasy. Miha-maro ireo tsy an’asa noho ny fihenan’ny fampiasam-bola eto amin’ny firenena. Mihamafy ny fiainana eto Madagascar ka manginy fotsiny ny tsy fisian’ny fandriam-pahalemana. Ny fanjakana etsy an-daniny dia tsy mahavita manome vahaolana mitombona sy maharitra entina hanenana ny fahatram-bahoaka efa mampiaiky volana ny rehetra. Vitsy, mba tsy ialazana hoe tsy misy, ny famoronana asa ataon’ny fanjakana. Ireo toe-javatra ireo dia mahavery fanahy mbola velona ny malagasy maro an’isa.

Tsy misy ny rafitra sy lamina voapetraka entina manaisotra mian-dàlana ny fahasahiranan’ny mponina fa zary fisehosehoana ivelany tsy latsa-pototra no tanterahan’ny mpitondra ankehitriny. Hany ka mitady hevitra rehetra ny tsirairay mitady ny vahaolana ho enti-mihavotra nohon’ny fahaverezam-pitokisana amin’ny fanjakana. Anatrehan’ireo tranga ireo dia hita fa miha-mahazo vahana ny fitsidihina ireny toera-pitsaboana nentim-paharazana sy fitaizana aram-panahy ireny mba hikatsahana ny tombontsoa sy hitadiavana ny rariny. Fitsaboana aretina, fitadiavana asa, fanitsiana ny lalam-piainana, fitadiavana vady, no tena antony hanatonan’ny olona ireny toeram-pitsaboana ireny, raha araka ny fanadiadiana natao. Olona an-jatony, nanana aretina tsy nahitam-bahaolana, toy ny homa-miadana, ohatra no nanatona an’ity toeram-pitsaboana Malagasy iray eny Ambanilalana Itaosy ity. Toeram-pitsaboana tsy mampiasa ny fomba ara-tsiantifika. Maro tamin’izy ireny ihany koa anefa no sitran’ilay mpitsabo. Mitady vahaolana haingana sy maharitra amin’ny fahasahirana ny olona ka mihazakazaka mamonjy ireny karazam-pitsaboana ireny. Ny mampiavaka ity fitsaboana ity moa dia akora voajanahary avokoa no am-piasainy entina hitsaboana olona ka tsy mampiasa akora simika tahaka ny amin’ny siansa izy. Ny fahombiazana anefa dia maro ho an’ny toeram-pitsaboana hany ka tsy olana amin’ny olona mpitsabo tena intsony ny saran’ny fitsaboana aloha. Tahaka ity vehivavy iray izay nitantara fa efa taizan’aretina nandritra ny taona maro ka rehefa nanatona teny Ambanilalàna Itaosy dia nahatsapa fanasitranana. “Efa nitety toeram-pitsabona maro aho fa tsy nahitako vahaolana, ny namako kosa no nanoso-kevitra ahy hanatona eny Ambanilàlana Itaosy”.
Mieli-patrana manerana ny nosy mihitsy moa ny karazana fitsaboana mivoaka amin’ny lalàn’ny siansa ankehitriny. Tao anatin’ny krizy no tena nahatsapana izany. Toy ity toeram-pitsaboana etsy Ambanilalàna Itaosy ity moa dia efa misy azy avokoa ny renivohim-paritra eto Madagasikara raha efa misy sampana ihany koa any amin’ireo tanàn-dehibe maneran-tany toy ny any California , Bruxelles, Paris, Rome, Port-Louis. Hany ka maro ihany koa ireo teratany vahiny manatona mitsabo tena etsy Ambanilalana Itaosy. Am-polony maro no milahatra etsy Ambanilalana Itaosy tonga mitady vahaolana amin’ny aretina sy ny fiainana. Fomba nolovaina tamin’ny fitsaboana jiosy moa no tena mampiavaka ity toeram-pitsaboana iray ity izay fantatra amin’ny hoe “fitsaboana kabalistika”. Mamerina fiainana mitotongana, mijery ny ho avy, mitsabo aretina, vintana sy karma. Izany no tena anton’asa ity toeram-pitsaboana etsy Ambanilalàlana Itaosy ity. Marihina moa fa dia sampana ao amin’ny antokom-pivavahana “Hebraique Judaisme International”, izay tarihin’ny Kohën Rivo Lala, ity toeram-pitsaboana ity. Tamin’ny taona 2009 no niforona ity farany ka efa Malagasy sy vahiny maro no resy lahatra amin’io fitsaboana io.