Mihorohoro ireo mpandraharaha

03/01/2013

Velon-tebiteby amin’izao fotoana izao ireo mpandraharaha indrindra ireo mpivarotra amin’ireo tanana manamorona ny lalam-pirenena faha 12 iny. Ny fisiana andian’olona izay tsy fantam-piaviana kanefa nanao fanadihadiana mikasika ny asan’izy ireo sy ny vola miditra aminy no nahatonga azy ireo ho velon-tebiteby. Naha-velon’ahiahy ireo mpandraharaha any amin’ny Faritra Vatovavy-Fitovinagny ny fahafantarana fa nisy andian’olona avy any Fianarantsoa nanontany teny amin’ny mponina tamin’ireo tanana nolalovany ny mombamomba ireo mpandraharaha na mpivarotra manao izany asa izany amin’ny toerana manamorona ny làlam-pirenena faha 12. Tamin’ny faramparan’ny volana desambra lasa teo no nitrangan’izany . Lehilahy avokoa izy ireo ary fiara mpitatitra olona no nitondra azy.

Isaky ny tanana lalovany dia nijanona izy ireo ary nanontany teny rehetra teny ny momba ny olona manam-bola na koa manan-karena sy mpandraharaha ao amin’izany tanana izany. Marihana fa tsy niresaka mivantana tamin’ireo mpandraharaha akory ireto olona ireto fa ireo olon-kafa teo amin’ny tanana no niresahany.
Fantatra ihan koa, araka ny vaovao fa niverina nihazo an’I Fianarantsoa ireto olona ireto rehefa avy niteny tanana maromaro. Fiara iray no nitondra azy ireo tamin’izany ary nofenoina mpandeha vitsivitsy ny toerana banga. Ireto farany no nahatsikaritra fa miala ao anaty fiara ireto olona ireto rehefa handalo amin’ireny mpitandro filaminana manao fisavana ireny izy ireo. Avy eo anefa dia miakatra indray, ary toy izany hatrany mandram-pahatongavana tao Alakamisy Ambohima. Talohan’ny hiditra an’ity tanana ity kosa dia niala avokoa ny ankamaroan’ireto olona ireto ary ny iray tamin’izy ireo no sisa tao anaty fiara. Ity no nanolotra ny vola saran-dàlana tamin’ny mpamily rehefa tonga tany Fianarantsoa izy ireo.
Mametram-panontaniana ny amin’izay tena ambadik’ity zava-nisy ity ny ankamaroan’ireo mpandraharaha, indrindra ireo mpivarotra manamorona ny lalam-pirenena faha 12. Ny mahakasika ny fiarovana no tena handehanan’ny sain’izy ireo amin’izany. Satria manahy ny amin’ny mety fisiana tetik’ady hanafihana mpivarotra amin’izany faritra izany izy ireo. Hatreto anefa dia tsy misy aloha ny fihetsika na tranga izay manamarina izany. Izany hoe mijanona ho ahiahy fotsiny ihany izany rehetra izany. Na izany na tsy izany dia manaitra ny sain’ny tompon’andrikitra ihany izy ireo mba handray fepetra hiarovana ny amin’izay mety hitranga.