Nifampiarahaba tratry ny taona

03/01/2013

Toy ny fanaony dia niditra mivantana tamin’ny alalan’ny antso an-telefaonina nandritra ny fihaonana tao amin’ny Magro Behoririka ny Filoha teo aloha Ravalomanana Marc, omaly. Ankoatry ny fiarahabana tratry ny taona ho an’ny vahoaka Malagasy, indrindra ny ankolafy Ravalomanana izay nivory tamin’io fotoana io, dia isan’ny nasongadin-dRavalomanana tamin’izany ihany koa ny fahitany ny toe-draharaha ara-politika amin’izao fotoana izao. Nankahery ireo mpomba azy ny tenany ary nilaza fa tsy maintsy hatao ny famerenana an’i Madagsikara amin’ny ara-dàlana. Manana finoana, manana fanantenana fa tsy maintsy ho avy ilay fotoana ahafantsika mihaona, hoy ny antso nataony. Tsy ho ela dia ho avy i Dada.

Averiko eto aminareo indray ary ampafantariko ny rehetra, hoy izy, fa tsy azo sandaina vola mihitsy aho. Noho izany mijery izay hamerenana amin’ny laoniny ny fiainan’ny vahoaka malagasy aho, ary mametraka ny finoako sy ny fanantenako fa ho avy ny fotoana ahafahantsika manandratra indray ny voninahitr’i Madagasikara ary miasa miaraka afahantsika manondrotra indray ny malagasy, Madagasikara malalatsika.Milaza aminareo mihaino ahy amin’izao fotoana izao hoy izy fa tsy hivadi-belirano amin’ny vahoaka malagasy mihitsy aho. Ny zava-dehibe dia tokana ihany , ny fifampitokisana, izaho mahatoky anareo ary ianareo matoky ahy fa tsy misy zavatra tsy vitantsika eto. Amin’ity taona ity dia ny fifanajana sy fifampitokisana, no fanantenana ao anatitsika.Tonga ny fotoana hitenenako izany hoy ny filoha teo aloha Ravalomanana Marc.
Fa isan’ny nisongadina nandritra izany fihaonana omaly izany ihany koa ny lahateny nataon’ny CT Raveloson Constant izay namakafaka ny dian’ny filohan’ny Tetezamita any Israel amin’izao fotoana izao. Nambarany fa namangy ny fasan’i David i Absalôma. Ity farany izay tsy izay fa zanak’i David raha araka ny voalaza ao amin’ny Soratra Masina, ary voasaringotry ny hazo ny volony nandritra ny ady izay natrehany ka nilazan’ny mpanoratra fa tsy an-tany tsy am-parafara.