Nosamborin’ny BC ny andrimasom-pokonolona

04/01/2013

Olona telolahy isan’ireo nanatanteraka ny andrimasom-pokonolona ka nahasamborana mpanakorontana tamin’izany fokontany izany no nosamborin’ny polisy avy amin’ny Brigade Criminelle, omaly. Tao amin’ny fokontanin’Andranomahery Ankorondrano no nisy izany tranga izany izay niteraka ny tsy fahafalian’ny ankamaroan’ny mponina tao amin’izany faritra izany. Araka ny fantatra dia nohon’ny fitarainana nataon’ilay voasambotry ny fokonolona no nahatonga izany fisamborana an’ireto andrimasom-pokonolona ireto izany. Ny fanazavana nataon’ny Sefo Fokontany tany an-toerana no nahafantarana fa nandritra ny fiambenana nataon’ny fokonolona no nahatratrarana ny rangahy anakiray izay nitondra antsibe nanakorontana tao amin’izany tanana izany.

Efa ho andro maromaro nialoha ny nahasamborana an’io lehilahy io no nahatsapa ny fokonolona fa nisy nanakorontana ny tananan’izy ireo. Izany hoe nisy nitoraka ny tafotrano ary nisy nandehandeha ihany koa tamin’izany tafotrano izany. Izay antony izay no nahatonga azy ireo nanao ny fiambenana tamin’ny alina. Nandritra ny fiambenana no nahatratrarana ilay rangahy izay mpanao izany fanakorontanana izany, izay nitondra antsibe teny aminy. Nosamborin’ny fokonolona anefa izy rehefa tratra ka nandritra izany no naharatrany nohon’ny fianjerany tamin’ny vato. Naratra ity lehilehy voasambotry ny fokonolona ity ka tsy nety nandry azy ny mpitandro filaminana tao amin’ny Polisy teny Ankorondrano. Ny fokontany no voatery niantoka ny fitsaboana azy teny amin’ny hôpitaly.
Fantatra ary,omaly, fa nohon’ny fitoriana nataon’ity olona voasambotry ny fokonolona ity dia nisy telo tamin’ireto farany no nosamborin’ny polisy avy ao amin’ny BC. Nambaran’ny Sefo fokontany fa tsy nahafaly ny vahoaka izao fihetsiky ny mpitandro filaminana izao ary mety ahatonga azy ireo hiraviravy tanana amin’ny fitandroana ny filaminana ao amin’ny tanana misy azy.