Nozarana « bonbons » !

04/01/2013

Tonga niarahaba tratry ny taona vaovao ny ministry ny Foloalindahy sy ny sekretariam-panjakana miadidy ny zandarimaria ireo jeneraly efa misotro ronono toa ny jeneraly Désiré Ramakavelo, Désiré Rakotoarijaona Jean, Tsaranazy, ny amiraly Rakoto ary ny “contre amiral” Abel Radavidson, … Nampahatsiahy ny zava-nitranga teto amin’ny firenena nandritra ny taona 2009 ireto manamboninahitra misotro ronono ireto, indrindra ny fahitan’izy ireo ny fihetsiky ny Foloalindahy amin’ny fampiasana fitaovam-piadiana izay heverin’izy ireo fa tafahoatra ary tsy mifanaraka amin’ny tokony ho izy. Ohatra amin’izany ireny fandravana hetsi-bahoaka teny Ambohijatovo ireny, mety tafiditra tao anatin’izany ihany koa ny « opération Tandroka ». Nivohitra nandritra ny fihaonana koa anefa adihevitra manodidina ny fisaraham-bazan’ny Tafika sy ny Foloalindahy. Naverin’ireo manamboninahitra mitàna andraikitra amin’izao fotoana izao tamin’ireo jeneraly sy manamboninahitra misotro ronono ireto anefa izany fanamarihana izany ; voakasika manokana ny jeneraly Désiré Rakotoarijaona sy ny raharaha Kung-fu. Sady lehiben’ny komandin’ny zandarimaria tokoa mantsy ny tenany tamin’izany fotoana no praiminisitra lehiben’ny governemanta. Tsy nisy toa iny fanafihana ny tobin’ny Me Pierre Be teny Manjakaray iny angamba raha mbola fampiasana fitaovam-piadiana teo amin’ny sivily sy ny miaramila satria nandrava ny TTS, tobin-jiolahin’ny fanjakana tetsy amin’ny Pochard ireo tanora mpanao kung-fu.

Etsy an-danin’izany, tsy miaramila na manamboninahitra fotsiny intsony ireto jeneraly misotro ronono ireto fa mpanao politika. Misy amin’izy ireo aza lehibe mpanorina antoko politika mihitsy kanefa izay fampidirana ny resaka politika ao anatin’ny Foloalindahy izay indrindra no tena loza mitatao ho an’ny Tafika Malagasy. Tsy midika akory izany fa tonga lafatra ny ataon’ireo mpitantana sy tomponandraikitra ambony eo anivon’ny Foloalindahy amin’izao fotoana; heverina mihitsy aza fa tena ilaina ny fampahatsiahana ireo tomponandraikitra hisorohana izay loza mety hitranga. Mendrika ny ho eo amin’izany toeran’ny mpananatra izany ve anefa ireo jeneraly misotro ronono ireto?
Nozarana “bonbons” avokoa ireto manamboninahitra nisotro ronono ireto taorian’ny fihaonana. Asa anefa raha mba azon’izy ireo an-tsaina ny dikan’izany vatomamy izany na tsia? Toa midika mantsy izany hoe “mandehana mikarakara zafikely ary aza mitsabatsabaka amin’ny fibaikoana na ny fomba fitantanan’ireo manamboninahitra am-perinasa ny tontolon’ny Tafika sy ny Foloalindahy!”.