Mbola tsy nahazo tambikarama ireo mpampianatra Fram

04/01/2013

Nanao fihetsiketsehana teo anoloan’ny biraon’ny Fiadidiam-paritry ny Fanabeazam-pirenena na ny DREN Analamanga, omaly ireo mpampianatra Fram mivondrona ao amin’ny fikambanana ANEFA. Fitakiana ny hanefana ny tambikaraman’izy ireo izay efa nampanantenaina talohan’ny fetin’ny Noely no anton’izany hetsika izany. Nilaza ny handray fepetra izy ireo raha toa ka tsy voaray alohan’ny alatsinainy izany tambikarama izany Tandindonin’ny tsy fahatomombanana sahady ny fidiran’ny mpianatra eny an’ivon’ny sekolim-panjakana eto amin’ny DREN Analamanga nohon’ny fisian’ny disadisa eo amin’ireo mpampianatra Fram sy ny tontolon’ny Fanabeazam-pirenena ato anatin’izany farim-piadidiam-pampianarana izany.

Raha ny zava-nisy teny amin’ny biraon’ny DREN Analakely omaly no resahana dia hita taratra fa tsy faly noho ny fanaovana fampanantenana poak’aty sy ny tsy firaharahiana azy ireo ny mpampianatra Fram mivondrona ao amin’ilay fikambanana fantatra amin’ny hoe ANEFA (Association nationale des enseignants Fram en activité). Arakan y nambaran’ny mpitondra tenin’izy ireo, Zafitsara Ferdinand Judicaël, dia efa talohan’ny fetin’ny noely no efa nampanantenaina fa homena azy ireo ny tambikarama tokony ho azony isaky ny roa volana. Mitentina 220 000 ariary isan’olona izany vola izany. Hatramin’izao anefa dia arirariran’ireo tompon’andrikitra isan’ambaratonga izy ireo. Misy ny milaza fa efa any amin’ny CISCO ny volan’izy ireo saingy tsy misy afa-tsy CISCO efatra amin’ireo CISCO valo ato amin’ny Faritra Analamanga no ahazo izany. Nambaran’ny ao amin’ny Tresor ihany koa fa tsy mikarakara ny volan’ny fanabeazana intsony izy ireo fa any amin’ny « Tresor inter-ministeriel » indray no mikarakara izany. Tsy fantatr’izy ireo arak’izany izay marina mikasika an’ity raharaha ity. Nanambara ary ireo mpampianatra Fram izay tonga teny anoloan’ny biraon’ny DREN fa hanao hetsika izy ireo raha sanatria ka mbola tsy azony ny volany alohan’ny alatsinainy izao. Isan’ny fitakiana nataon’izy ireo ihany koa ny mba hanajana ny daty fanomezana ny tambikaraman’izy ireo satria hatreto dia amin’ny fotoana tian’ny ministera hanaovana izany no handraisan’izy ireo izany tambikarama izany.
Ankoatr’izay dia nampatsiahy ihany koa ireo mpampianatra Fram fa nampanantena ny handray mpampianatra miisa 600 ho lasa mpampianatra raikitra ihany koa ny ministeran’ny fanabeazana amin’ity taom-pianarana ity. Hatreto dia mbola tsy hita taratra ny fanatanterahana an’izany fampanantenana izany araka ny fanamarihan’izy ireo. Takin’izy ireo anefa ny fanetanterahana an’izany.
Marihina fa mahatratra 60 000 ny isan’ny mpampianatra Frame to Madagasikara. Ny 75% n’ireo dia ato amin’ny Faritra Analamanga avokoa.