Mamboly krizy vaovao indray ny Tetezamita

04/01/2013

Nilaza ny hevitry ny fikambanana tarihany mikasika ny fanafarana fiara fitateram-bahoaka na “bus” vaovao hampiasaina eto Antananarivo ny filohan’ny VOMZM (Vondron’ny olona miaro ny zon’ny mpanjifa). Tondroin’izy ireo ho antony iray lehibe hiteraka krizy vaovao eto amin’ny tananan’Antananarivo ny fahatongavan’ireo “bus” ireo. Manahy mafy ny hisian’ny fanovana ny lamina efa misy amin’izao fotoana izao, indrindra ny mety hisian’ny fandravana trano ity fikambanana ity “Tsy hitondra vahaolana eo amin’ny fasahiranam-bahoaka va vao maika hampiditra korontana eto amintsika ny fampidiran’ny tetezamita fiara fitateram-bahoaka vaovao eto Antananarivo”.

Izay no nambaran’ny filoha nasionalin’ny Vondron’ny olona miaro ny zon’ny mpanjifa na ny VOMZM, Rasolofosaonina Ratsimbazafy Eugène, raha nanontaniana miksika ny tetik’asan’ny fiadidiana ny tetezamita miaraka amin’ny UCTU (Union des cooperatives des transporteurs urbains) ny tenany. Araka ny fanazavan’ity mpiaro ny zon’ny mpanjifa ity dia tsy hisalasalana ny hisian’ny fanakorontanana ny lamina efa misy amin’izao fotoana izao amin’ny fahatongavan’ireo “bus” vaovao ireo eto amintsika. Tokony tsy hadino ihany koa, araka ny fanamarihan’ity tompon’andrikitra ity fa tsy misy afa-tsy kôperativa vitsivitsy ao anatin’ny UCTU no hahazo tombontsoa amin’ny fampidirana ireo fiarabe vaovao hafaran’ny fiadidiana ny teteaamita ireo. Izany hoe tsy ny mpitatitra rehetra akory no hahazo tombontsoa avy amin’izay. Tsy hahazo tombontsoa ihany koa ny mpanjifa satria hatreto dia tsy azo antoka ny hisian’ny fampidinana ny saram-pitaterana rehefa tonga ireo “bus” ireo. Ary mbola ipetrahan’ny ahiahin’ny vondron’ny olona miaro ny zon’ny mpanjifa ihany koa ny mety hisian’ny fandravana tranon’olona eto Antananarivo. Araka ny fahitan’izy ireo dia ho sarotra ny fifamoivoizana eto Antananarivo raha ampiana an’ireo “bus” ireo ny efa misy eto an-toerana amin’izao fotoana izao raha tsy mandrava trano amin’ny sisin-dàlana indray ny mpitantana ny tanana.
Ankoatr’izay rehetra izay dia isan’ny nanakianan’ny VOMZM izao tetik’asa fampidirana “bus” tsy fanatanterahan’ny mpitatitra eto an-drenivohitra ny fanambarana izay nataon’ny fiadidiana ny tetezamita mikasika ny fanenana ny saran-dàlana ho an’ireo mpiasa eny amin’ireo orin’asa afak’aba sy ho an’ny mpianatra ho 300 ariary. Tsy tanteraka io fampanantenana io hatramin’izao, hoy ny filohan’ny VOMZM. Kianiny ihany koa ny tsy fisian’ny fiaraha-midinika tamin’ny mpanjifa ny fikasana hampiditra ireo “bus” vaovao ireo eto Antananarivo.
Ireo antony rehetra ireo ary no ilazan’ity filohan’ny fikambanana miaro ny zon’ny mpanjifa ity fa tsy hisalasalana ny hisian’ny krizy vaovao eto Antananarivo raha toa ka misy ny fahatongavan’izany “bus” vaovao izany eto amintsika. Tsiahivina fa herinandro lasa izay no nandeha tany Chine ny delegasiona nahitana ny solontena avy ao amin’ny fiadidiana ny tetezamita sy ny avy amin’ny UCTU, hijery ireo “bus” izay heverina fa hafarana ka hampiasaina eto Antananarivo. Mbola tsy voafaritra mazava tsara kosa ny fahatongavan’izany fiara fitateram-bahoaka izany eto Antananarivo.