« Tokana ny antoko Leader Fanilo »

04/01/2013

Naneho ny heviny mikasika ireo vaovao an-gazety izay milaza ny fivakisan’ny Antoko Leder Fanilo hatramin’ny fahavitan’ny fifidianana ny filoha nasionaly vaovao izay natao farany teo ny Minisitra Rakotomamonjy Jean Max, sady filoa nasionaly vaovaon’ity antoko ity. Nambarany fa tsy mivaky roa velively ny antoko tarihiny. Porofon’izany, hoy izy, ny fanoloran’ny mpifaninana taminy kandidà ho amin’ny toeran’ny kandidà atolotry ny antoko Leader Fanilo amin’ny fifidianana filoham-pirenena. Midika izany hoy izy fa mbola samy ao anatin’ny Antoko avokoa izy ireo amin’izao fotoana izao.

Nitondran’ny minisitra Rakotomamonjy Jea Max fanazavana ihany koa ny mikasika ny fifidianana izay nahalany azy ho filohan’ny antoko Leader fanilo. Nambarany fa tao anatin’ny fanajana ny demokrasia tanteraka ny nanatanterahana izany fifidnana izany, ka mpifidy miisa 84 no nandany azy raha nifidy ilay mpifaninana taminy kosa ny mpifidy miisa 51. Mazava arak’izany, hoy ihany ny fanazavany fa lany tamin’ny fifidianana ara-demokratika ny tenany. Notsiahiviny fa toy izay nitranga nandritra ny tolom-bahoaka ihany ny mitranga ao amin’ity Antoko ity amin’izao fotoana izao. Satria tamin’ireny fotoana ireny dia nisy ireo mpikambana no nanara-dia ny Escopol, saingy nisy ihany kosa ireo izay niara-dàlana tamin’ny UDRC.
Omaly no nanatitra teny amin’ny Ministeran’ny Atitany ny ireo atontan-taratasy fametrahana ho ara-dàlana ny antoko Leader fanilo ny filoha nasionaliny, nontronin’ireo mpikambana amin’ny birao nasionaly. Tamin’izany ihany koa no nanambarany fa hanolotra kandidà amin’ny fifidianana filoham-pirenena ity Antoko ity. Teo anelanelan’ny 21 desambra ka hatramin’ny 31 desambra lasa teo no nahafahan’ny mpikambana isan’isany avy nametraka ny filatsahan-ko fidiny ho kandidan’ny Antoko Leader Fanilo, hoy ny fanazavany. Mandritra ny fivoriana iarahan’ireo mpikambana ao amin’nybirao foiben’ny antoko miaraka amin’ireo solon-tena avy amin’ny faritra isan’isany avy no hanendrena izany kandidàn’ny antoko izany.