Voasambotra ilay « agent payeur » teo aloha teny Ankatso

05/01/2013

Vola tsy toko tsy forohana no voahodikodin’ilay “agent payeur” teo aloha tao amin’ny Faculté des Sciences teny Ankatso, raha araka ny tatitra izay navoakan’ny Polisim-pirenena. Ny fanadihadiana natao taorian’ny famindram-pahefana natao teo aminy sy ny mpandimby azy no nahitana ny fisian’izany fanodikodinam-bola izany. Ny alakamisy teo no nosamborin’ny mpitandro filaminana izany lehilahy izany ary nandritra ny fakana am-bavany azy dia niaiky ny heloka nataony ny tenany. Tsy voatery ho avy amin’ny fahataran’ny fanomezan’ny fanjakana ny vatsim-pianarana ny tsy fahatomombanan’izany ka mahatonga ny disadisa matetika eny amin’ny anjerimanontolo.

Voaporofo tamin’ny fisamborana ny “agent payeur” teo aloha tao amin’ny Faculté des Sciences fa mety ho vokatry ny fanodikodinam-bola ataon’ny tompon’andraikitra ihany koa izany. Fantatra araka ny vaovao nampitain’ny Polisim-pirenena fa nosamborin’ny mpitandro filaminana ny alakamisy 3 janoary lasa teo ny “agent payeur” teo aloha tao amin’ny Sampam-pampianarana momba ny siansa (Faculté des sciences) teny Ankatso, izay efa nandeha nisotro ronono hatramin’ny 26 novembre lasa teo. Araka ny fanadihadiana natao dia fantatra fa nanodikodim-bolam-panjakana ity tompon’andraikitra ity fony izy teo amin’izany toerana maha “agent payeur” izany. Ny fitsirihana natao mahakasika ny fitantanam-bola taorian’ny famindram-pahefana nataony no nahitana fa vola tsy latsaky ny 224.696.00 ariary no nanjavona teo anelanelan’ny volana janoary 2012 ka hatramin’ny 26 novembre 2012 izay nniandraiketan’ity lehilahy ity izany asa izany. Ny “Brigade de l’Inspéction et de la Vérification du Trésor” izay nisahana ny fanadihadiana no nametraka ny fitoriana azy ary ny « Sérvice provincial de la Police Economique » ato anivon’ny Farintanin’Antananarivo kosa no nandray an-tanana ny raharaha ka nanao ny fikarohana azy sy nahasamborana azy tany Ankadivory Fenoarivo.
Miandraikitra ny vola misitra sy mivoaka teny amin’ny Faculté des Sciences teny Ankatso ity Agent payeur ity. Izany hoe izy no maka ny vatsim-pianaran’ny mpianatra, ny saram-pianaran’ireo mpianatra eny amin’ireo Formation spécialisante, ny vola azo amin’ny certification-na diplaoma ary ny hofan’ny buvette. Raha araka ny tatitra nataon’ny Polisim-pirenena izay nampita ny vaovao dia toy izao ny fanaon’ity “ agent payeur” ity ka nahafahany nanao izao fanodikodinam-bolam-panjakana izao. Izy no maka ny vatsim-pianarana eny amin’ny Trésor na teny amin’ny Banky. Tazoniny any aminy izany, ary izy ihany no mizara izany vatsim-pianarana izany izay anombinany ka mahatonga ny korontana matetika eny amin’ity sampam-pampianarana ity. Izy ihany koa no mandray ny saram-pianaran’ireo mpianatra ao amin’ny Formation spécialisante ka mitahiry izany. Ahodiny ihany koa izany. Toy izany koa ny hofan’ny buvette sy ny vola azo amin’ny Certification. Rehefa manao fanambarana an-tsoratra ny fivezivezen’ny vola izy dia ny vola mivoaka no vitany amin’ny an-tsipirihany fa ny vola mivoaka tsy voalazany.
62 taona ity “agent payeur” ity. Araka ny nambaran’ny loharanom-baovao dia niaiky ny heloka vitany izy nandritra ny famotorana. Tsy isalasalana ihany koa anefa ny milaza fa taratry ny tsy fahatomombanan’ny fanaraha-maso ny fitantanana eny amin’ny anjerimanontolo ihany koa ny nahavitan’ity “agent payeur” ity izany fanodikodinam-bola izany.