Fisakanana ny fanokafana indray ny Radio FreeFM

05/01/2013

Nifanandrify indrindra tamin’ny fangatahan’ny radio FreeFM ny fiverenany eo amin’ny sehatry ny haino aman-jery ny fivoahan’ilay didim-pitsarana izay manameloka azy ireo an-tranomaizina, raha araka ny fanambarana nataon’i Rakotondrazafy Lalatiana sy Razara Pierre Fidèle, omaly. Nazavain’izy ireo ihany koa fa tsy nahafantatra ny fisian’izany fitsarana azy ireo izany izy ireo raha tsy tamin’ny alalan’ny lahatsoratra an-gazety. Ary taorian’izany vao tonga teo am-pelan-tanany ny taratasy manambara amin’izy ireo ny fanamelohana azy sy ny tsy faneken’ny ministeran’ny Serasera ny fangatahana nataony. Hanao fanoherana mikasika ity didim-pitsarana ity, arak’izany ny mpisolovava azy ireo.

Ity raharaha ity ilay tonga amin’ny fitenenena manao hoe: “tsy miady nefa ny kibay an-tsakelika ihany”. Satria na dia teo aza ny voalaza fa fifanarahana nifanaovana tamin’ny fitondrana Tetezamita mahakasika ny raharaha Lalatiana Rakotondrazafy sy Fidèle Razara Pierre, izay azo lazaina fa isan’ny taratry ny fitoniana eto amin’ny firenena dia tsy nahasakana ny fanenjehana azy ireo sy ny fanamelohana azy eo anatrehan’ny fitsarana izany.
Araka ny fanazavana nataon’ireo voapanga izay nanao valan-dresaka ho an’ny mpanao gazety omaly teny amin’ny foiben’ny FreeFM teny Namontana, dia betsaka ireo zava-nitranga izay ahafahana milaza fa sotasota natao manoloana ny fiverenan’ny radio FreeFM izao raharaha izao. Araka ny fantatra dia tamin’ny 28 desambra lasa teo no nampahafantatra ny ministeran’ny Serasera ny fanapahan-kevitr’izy ireo hamerina amin’ny laoniny tanteraka ny fandaharany ny radio FreeFM. Famerenana ny fandaharana izay mifandraika tanteraka amin’ireo fepetra efa nifanarahana tamin’ny fitondrana tetezamita, taorian’ny fampitsaharaha ny fanenjehana azy ireo. Akory anefa ny fahagagan’ireo mpiasa ao amin’izany onjam-peo izany fa tamin’ny alalan’ny gazety no nahafantarana fa misy didim-pitsarana izay manameloka an’i Rakotondrazafy Lalatiana Henriette, Razara Pierre Ravolaza Fidèle, Raharifidy Rado, Rafalimanantsoa Hajarison noho ilay raharaha fitarihana olona teny amin’ny kianjan’ny 13 mai tamin’ny taon-dasa. Ny andro nivoahan’io lahatsoratra an-gazety io ihany koa vao tonga nampahafantatra azy ireo izany didim-pitsarana izany ny “huissier”. Ankoatr’izay dia mbola tamin’io andro io ihany koa no nampahafantatra ny fanampahan-keviny tsy hanome alalana ny FreeFM hamerina ny fandaharany araka ny fangatahana nataony ny ministeran’ny Serasera. Tsy vitan’izany fa nibaiko azy ireo hampitsahatra tanteraka ny fandaharan’ny radio FreeFM ny ministera tamin’ny alalan’izany fampahafantarana izany, ary nanambara ny hampiantra ny didim-pitsarana amin’ny fanageazana ny fitaovan’ny radio ihany koa.
Arak’ireo tranga rehetra ireo, sy ny fanandrifian’izany rehetra izany dia resy lahatra ireo izay voakasik’ity raharaha ity fa azo heverina ho paik’ady entin’ny fitondrana handrahonaana na hisakanana tsitr’izao ny fiverenan’ny FreeFM eo amin’ny tontolon’ny asa maha mpanao gazety azy ireo izany. Tsy hiraviravy tanana anefa izy ireo araka ny fanambarany fa hanao fanohanana ity didim-pitsarana ity. Nambaran’ny mpisolovava ny Free FM fa ny andininy faha 397 ao amin’ny andinin-dàlana famaizana (code pénale), no manome fahafahana azy ireo hametraka fanohanana ity didim-pitsarana ity.
Tsara ny mampatsiahy fa ny fitsarana natao tamin’ny 20 novembra 2012 tao amin’ny efitrano faharoa tao amin’ny lapan’ny fitsarana tao Anosy Antananarivo no namoahana ny didy manameloka an-tranomaizina mandritra ny 3 taona an’i Rakotondrazafy Lalatiana Henriette, Razara Pierre Ravolaza Fidèle, Raharifidy Rado ary I Rafalimanantsoa Hajarison. Ankoatry ny sazy sy ny onitra dia nandidy ny fanagejana ny fananan’ny Radio Free FM ihany koa ny fitsarana. Ireto avy ny heloka niampangana azy ireo: fiantsiana fankahalana fitondram-panjakana, fanimbana fananam-bahoaka, fanoherana mpitandro filaminana, famoriam-bahoaka tsy nazoana alalana.

Tsy vitsy ireo mampifandray ity raharaha ity amin’izay nitranga tamin’ny 26 janoary 2009 izay iarahan’ny rehetra nahalala fa nisy famoriam-bahoaka tsy nazoana alalana, nisy fanimbana fananam-bahoaka, nisy fanoherana mpitandro filaminana, nisy fiantsiana sy fankahalana fitondram-panjakana, ay tsy vitan’izany fa niafara tamin’ny famoizana ain’olona ny raharaha. Koa raha telo taona no sazy nomen’ny fitsarana an’ireo izay voapanga tamin’ny raharaha FreeFM, mba firy taona kosa no ho azon’izay nitarika iny raharaha 26 janoary 2009 iny sy ny radio izay nivoy izany tamin’io fotoana io?