Hankinina amin’ny CSC indray

19/10/2012

Tsy nankatoavin’ny filankevitry ny Governemanta ny fanendrena ireo mpikambana 44 mandrafitra ny Filankevitra Fampihavanana Malagasy na ny FFM. Ankinina amin’ny Komity mpanara-maso ny fampiharana ny Tondrozotra na ny CSC manomboka izao ny fifidianana izay ho mpikambana vaovao amin’ity rafitra ao anatin’ny tetezamita ity. Homena fitaovana sy vola ahafahany manao izany asa izany ny CSC, raha tara vao nahazo ny enti-manana tamin’izany ny komity mpisafidy ny FFM izay natsangan’ireo avy amin’ny fiaraha-monim-pirenena.

Averina ny fisafidianana ireo mpikambana 44 izay handrafitra ny Filankevitra fampihavanana Malagaasy. Tsy nahazo fankatoavana avy amin’ny governemanta arak’izany ny asa nataon’ireo mpikambana ao amin’ny komity manokana izay natsangan’ireo Fiaraha-monim-pirenena hanendry ireo mpikambana ao amin’ity rafitra ity. Fanendrena izay efa tontosan’izy ireo, herinandro vitsy izay. Araka ny fanazavana avy amin’ny minisitry ny Fifandraisana amin’ny Andrim-panjakana, Manantsoa Victor, dia nahitana lesoka maro, izay miteraka ny tsy fazoana antoka ny fahamarinan’iny safidin’ireo mpikambana tao amin’ny komity mpisafidy ny asa izay nataon’ireto farany ireto. Nambaran’ity mpikambana ao amin’ny Governamanta ity ihany koa fa efa nanao fanadihadiana manokana momba ny fomba nanendrena ireo mpikambana tao amin’ny FFM izy ireo ary avy amin’izany fanadihadiana izany no nahafantarana fa betsaka ny tsy ara-dàlana tamin’ny asan’ireo komity ireo. Isan’ny voalaza fa anton’izany tsy fetezan’ny asan’ireto komity irerto izany ny tsy nananan’izy ireo vola nentina nanatanteraka ny asany. Vokatr’izany dia tsy afaka nandeha tany amin’ny faritra isan’isany avy nanao ny fanadihadiana momba ireo olona nirotsaka ho mpikambana ao amin’ny FFM izy ireo.
Manoloana izany tsy fahatomombanan’ny asan’ny komity mpisafidy ny mpikambana tao amin’ny FFM izany dia nanapa-kevitra ny hamerina ity fisafidianana ny FFM ity ny governemanta. Arak’izany dia notendrena hanao izany ny Komisiona misahana ny fanaraha-maso ny fampiharana ny Tondrozotra na ny FFM.
Marihina fa nanamafy ny tsy fitsabahan’ny governemanta amin’ny asan’ny CSC hisafidy ny FFM ny Praiminisitra Omer Beriziky. Nambarany anefa etsy an-danin’izany fa efa misy ny toromarika vaovao mba hahatomombana an-tsakany sy an-davany ny fananganana ity FFM ity. Tsar any mampatsiahy fa rafitra iray voalazan’ny tondrozotra ny FFM. Araka io anarany io dia ity rafitra ity no hisahana ny fametrahana ny fampihavanana eto amin’ny firenena ao anatin’izao fotoanan’ny tetezamita izao.