Mety hiafara amin’ny fanenjehana an-dRajoelina

08/01/2013

Tsy vitsy ny naneho ny heviny manoloana ny fanambarana nataon’ny mpiandraiki-draharahan’I Etazonia eto Madagasikara mahakasika ny tsy mbola fanekeny ny hiverenan’i Madagasikara ho isan’ny firenena mahazo ny AGOA. Ho an’ny manampahaizana eo amin’ny fifandraisana iraisam-pirenena, Radanoara Julien dia hafatra mifono ny tsy fiovan-kevitry ny Amerikanina amin’ny tsy fankatoavany an’izao fitondrana izao ireny. Tokony hikaroka hevitra hafa manoloana izay ny mpitondra, indrindra ny filohan’ny tetezamita, hoy izy satria hiafara amin’ny fanenjehana azy eo amin’ny fitsarana iraisam-pirenena ny fiziriziriany manoloana izay hevitry ny Amerikana momba ny fisian’ny tsy fanajaana ny zon’olombelona eto Madagasikara izay.

Tsy tokony ho tsinontsinoavin’ny fitondrana Tetezamita, indrindra ny filoha Rajoelina ny hafatra misesisesy avy amin’ny fotondram-panjakana amerikanina manoloana ny zava-misy amin’izao fotoana izao raha ny fahitan’ny mpahay eo amin’ny lafiny fifandraisana iraisam-pirenena, Radanoara Julien. Araka ny fahitany dia fanerena izao fitondrana izao handray ny andraikiny amin’ny fanalàna an’i Madagasikara ao anatin’ny tsy ara-dàlana no tena anton’izany hafatra rehetra izany. Ny mbola fametrahana an’i Madagasikara ho isan’ny firenena tsy mahazo ny AGOA dia midika fa firenena tsy mahafeno ny fepetra amin’izany intsony ity firenena ity. Marihina fa isan’ny nomarihan’i Etazonia manokana amin’izany ny tsy fanajana ny zon’olombelona misy eto amintsika. Tsiahivina ihany koa ireo tatitra nataon’ny Amnesty International izay manizingizina fa nisy tokoa ny tsy fanajana ny zon’olombelona indrindra tamin’ny raharaha tany atsimo.
Tsy tongatonga ho azy ihany koa ny fitakian’ny fianankaviambe iraisam-pirenena ny hanaovana fanadihadiana mikasika ny raharaha tany antsimo sy ny vono olona nitranga tany amin’iny faritra iny. Toy izay nitranga tany amin’ny firenena maro izay nanaovan’ny Amerikanina fihetsika toy izay dia azo heverina ihany koa ny hanenjehana ny filohan’ny Tetezamita eo amin’ny fitsarana iraisam-pirenena raha toa ka voamarin’ny fanadihadihana iraisam-pirenena fa nisy tokoa ny tsy fanajana ny zon’olombelona tamin’ny fanenjehana nataon’ny mpitandro filaminana tany atsimo. Amin’ny maha filoha faratampon’ny tafika ny filohan’ny tetezamita no ahatanterahan’izany satria izy no tompon’andraikitra voalohany eo amin’izay ataon’ny tefika.
Nomarihan-dRadanoara Julien ihany koa fa tsy tongatonga ho azy raha mialoha ny fanatanterahana ny lanonana fifampiarahabana tratry ny asaramanitra eo amin’ny andrim-panjakan’ny tetezamita sy ny masoivoho vahiny eto Madagasikara no nanaovan’i Etazonia iny fanambarana iny, izay manery ny Filohan’ny tetezamita hamaly sy hanome ny fanazavany momba ny tena zava-misy marina eto Madagasikara mandritra io lanonana io. Tsy ampy, hoy ihany ity manampahaizana ity ny fandehanan’ny Filohan’ny tetezamita tany Israël raha nihevitra izy fa ny hampilefitra an’i Etazonia amin’ny fijeriny an’i Madagasikara no anton’izany. Satria efa naman’ny valin-kafatra avy amin’ny Amerikanina iny fanambarana nalefan’ny mpiandraiki-draharahany eto amintsika tamin’ny faran’ny herinandro iny.