Nilanja vilany an-dalambe ny mpiasan'ny Fahasalamana

20/10/2012

« Vilany vide! », izay no anarana nampitondran’ireo mpiasan’ny ministeran’ny Fahasalamana sy ny Paramed ny hetsika fanairana nataon’izy ireo omaly tetsy anoloan’ny ministera Ambohidahy. Naharitra adim-pamataranandro roa izany hetsika an-dalambe nataon’izy ireo izany. Fiaraha-mientana amin’ireo mpiasan’ny Fahasalamana miisa 80 tapaka karama noho ny hetsika sendikaly nataon’izy ireo no anton’izao fidinana an-dalambe miaraka amin’ny vilany « vide » izao ary koa fitakiana ilay « grille indiciaire » 1200 fmg. Notapahan’ny fanjakana Rajoelina tokoa mantsy ny

karaman’ireo mpitarika sendika teo anivon’ny Paramed, isan’izany ny filohany Valérien Rakotonandrasana, taorian’ny nanolorana azy teo anatrehan’ny Fitsarana izay nanafaka azy madiodio. Toa hoe niverina niasa ny 24 tamin’ireto mpiasa tapaka karama ireto saingy tsy mbola nandray ny karamany taorian’izany fiverenan’izy ireo namonjy ny toeram-piasany izany. Efa nahazo taratasy fandrahonana fandroahana ireo Paramed tsy mbola namonjy asa, ny alakamisy lasa teo. Nambaran’izy ireo fa tsy hihemotra amin’ny fitakiany izy ireo, mandra-pahazoana valinteny mahafam-po avy amin’ny fitondram-panjakana.
Batemy
Tonga teny an-toerana ny mpitandro filaminana avy ao amin’ny Emmo; nisy ny fifampiresahana teo amin’ireo mpitarika ny hetsika sy ny mpitandro filaminana. Tsy nisy noho izany ny korontana sy ny fihoaram-pefy. Santatra voalohany ho an’ny lehiben’ny CIRGN Antananarivo, ny kolonely Rakotomahanina iny hetsika « vilany vide » nataon’ny mpiasan’ny Fahasalamana sy ny Paramed iny. Vita batemy omaly araka izany ity manamboninahitra vaovao nisolo toerana ny jeneraly Ravalomanana Richard ity. Nampanantena anefa ireo Paramed fa tsy hijanona amin’izao hetsika fanairana izao rahatoa ka tsy handray fanapahan-kevitra mihitsy ny fitondram-panjakana.
Dingana farany
Efa miatrika ny dingana farany ny fitondrana Tetezamita dia ny famerenana ny filaminam-bahoaka. Tsy resaka fandikan-dalana ataon’olon-tsotra fotsiny ihany (crime et délit) na koa ny fitandroana ny fahalemana (maintien de l’ordre) intsony mantsy no andraikitry ny mpitandro filaminana. Efa famerenana ny filaminam-bahoaka (rétablissement de l’ordre) no hatrehan’izy ireo eto amin’ny firenena, raha tsy hiresaka afatsy ny zava-misy any Atsimo fotsiny ihany. Io no dingana faratampony, araka ny nambaran’ny manampahaizana. Raha vao io dingana io no tsy vita dia hiverina ny zava-nitranga ny faha-26 janoary 2009; izany hoe tsy fisian’ny fanjakana sy ny lalàna ao anatin’ny rafi-piaraha-monina. Izany hoe, ny sivily no mametraka ny lalàna araka izay tiany sy mety aminy, mitovy tamin’ny zava-nitranga tany Rwanda ary efa izany mihitsy ny zava-nisy tany Atsimo.