Tsy “coffre” vaky nefa very ny vola 110 tapitrisa ariary

08/01/2013

Vao niditra ny taona vaovao dia tranga hafahafa nahitana tambazotra avo lenta nitranga teo anivon’ny orinasa misahana ny entana misaritaka eo anivon’ny seranan-tsambon’i Toamasina.

Tranga hafenin’ny tale jeneralin’ny orinasa SMMC na “Société Manutention des Marchandises Conventionnelles” mafy anefa ity fahaverezana vola be tao aminy teo anelanelan’ny 28 desambra 2012 hatramin’ny 02 janoary 2013. Mitentina Ar.110 tapitrisa ity vola nanjavona tao anaty “coffre” tsy nahitana fahavakisana ity; ka raha ny vaovao nangonina teo amin’ny olona mahalala tsara ity raharaha hafahafa nitranga tao amin’ny SMMC Toamasina ity, dia ny zoma 28 desambra 2012 no tena heverina fa nitranga ny fangalarana ny vola be tao anatin’ilay “coffre”; satria tamin’io fotoana io no nitrangana fihetsika hafahafa teo amin’ny mpiasa sasany sy ny mpiambina ary ny mpihazom-bola. “Caisses” roa, dia ny “caisse recettes” sy “caisse depenses”, no misy eo anivon’ity orinasa ity izay samy manana ny “coffre” ho azy avokoa izy ireo; ka ny vola tao anatin’ilay “coffre” ny “caisse depenses” ity nisy nangalatra ny vola be tao anatiny ity, satria ny vola be niditra tao amin’ny “caisse recettes” dia efa nisy ny nalefa teny amin’ny banky ny ambiny kosa ity nafindra tao amin’ny “coffre” ny “caisse depenses” ity noho mety filana vola tampoka amin’ny fandoavana ny karaman’ny mpiasa sy filana hafa ny orinasa noho ny fetin’ny faran’ny taona. Tetika efa nomanina ilay halatra, teo ny tsy famonoana ny jiro tao anaty birao, teo koa ny fandroahana nataon’ny mpiambina ireo mpiasa tara fodiana; nandritra izay anefa ilay mpiambina mpihazona ny fanalahidin’ny orinasa sady tsy hita tampoka no tsy azo tamin’ny findainy. Efa eo am-pelan-tanan’ny polisy misahana ny raharaha ara-barotra sy ara-bola ary ady amin’ny kolikoly ny raharaha, ka ho hita eo ny tohiny…Nefa efa re sahady izao, fa misy ny fanelanelanana an-dalantsara noho ireo mpihazona ny “caisse” roa ny orinasa tsy maintsy isany hanaovana fanadiadiana ihany koa mikasika ny vola be very nefa ny “coffre” tsy vaky ity, ny iray izy ireo anefa amin’ity taona ity no hiditra hisotro ronono.