NY OLANA POLITIKA NO SAKANA.

09/01/2013

“Tsara ny taom-pizahan-tany ny taona lasa iny raha jerena amin’ny ankapobeny. Nanomboka ny taona 2012 iny mantsy no niverina tahaka ny taona 2008 ny fahatongavan’ireo mpizahan-tany mpisafidy an’i Madagasikara”, izay no nambaran’dRtoa Eliane Andrianjatovo misahana ny “Arian tour” sy ny sekoly tsy miankina hany tokana mpanofana amin’ny resaka fizahan-tany “Arian Institute”. Ny taona lasa 2012, dia ny lakan-dranonin’ny “Pangalanes” no voalohany tena nahasarika ireo vahiny tonga raha ho an’i Toamasina, efa betsaka raha teo ny fanovana fomba fiasa sy tolotra maro omena ireo mpizahan-tany misafidy izany, isan’izany ny lakana motera mpitondra ireo mpizahan-tany sy ny hetsika fandraisana manokana nanentanana ireo mponina isaky ny tanana ary ny fanatsarana ny tanana hahasarika ireo mpitsidika; nanaraka izany ny nosy Sainte Marie indrindra amin’ny fotoan’ny “Zanaharibe” na fahatongavan’ny “Baleines”; manaraka azy kosa ny Mahavelona Foulpointe sy Mahambo ary “parc Ivoloina”.

Na teo aza ny fahatsaran’ny fizahan-tany dia isany nanamarika ny taona 2012 ny fanafohanan’ny vondrona “Costa” ny Dia fanaony tamin’ny ranomasim-be Indiana indrindra ireo Dia fanaony mitety ireo toerana malaza manodidina an’i Madagasikara; ny antony dia ilay olana tamin’ny sambo “Costa Allegra” tao akaikin’ny nosy Seychelles nefa ny fomba fanavotana ny nosy manodidina sady tsy nisy no mbola tara ihany koa ary tsy nanaram-penitra. Nefa ity sambo “Costa” ity no mba rivotra namenola ireo mpiasa tamin’ny fizahan-tany noho ny fandalovany isaky ny 15 andro ary nanao fiantsonana 10 na 12 raha ho an’i Toamasina.
Ankilan’izay, isany olana sedrain’ireo mpandraharaha ara-pizahan-tany dia ny zava-misy eo anivon’ny kaompania “Air Madagascar”, izay tsy vitany tara fiaingana lava, fa mbola manafoana zotra matetika ihany koa, ary ny fanemoram-piaingana saika efa isan’andro; manginy fotsiny moa ireo zotra ivelany nosy maty an-tanin’olona sy simba lava any an-tany lavitra. Nefa araka ny naoty navoakan’ny orinasa ny taona lasa, dia tsy manao famerenam-bola intsony ny orinasa amin’ny fanafohanan’ny mpandeha ny Diany sy in-01 mandeha ihany no afaka manova famandriana ny mpandeha iray.
Ankoatra ireo olana rehetra ireo, dia ny olana ara-politika mety ho sedrain’ny firenena amin’ity taona ity noho ireo fifidianana hitranga sy ny fangotrahan’ny resaka politika ihany koa ao anatin’izany. Mbola ny frantsay anefa no mpizahan-tany maro misafidy an’i Madagasikara, nefa izy ireo indrindra no tena manaraka akaiky ny resaka politika eto amintsika.