IRAY VOLANA TSY MISY HERIN’ARATRA

09/01/2013

Miaina isan’andro amin’ny fahatapahan’ny ny mponin’i Toamasina tao anatin’ity taona vaovao ity; tsy misy fotoana ka tsy ahitana fatapahana herin’aratra isan’andro ao an-tampon-tanana ka arakaraka ny fokontany ny faharetany, izay manomboka amin’ny adiny iray izany ary misy mahatratra tapak’andro mihintsy, raha alina ny fahatapahana dia mandra-maraina izany.

Isany olana ho an’ny mpandraharaha miaina isan’andro amin’ny alalan’ny herin’aratra ny fatapahana lava, hany ka tsy afa-miasa afa-tsy patak’andro na adin’ny 05 monja isan’andro izy ireo; misy aza ny alina vao manenjika ny asa tsy vitany ny atoandro mihintsy. “Tsy afa-miasa mihintsy izahay, ny vadiko aza eo am-panaovina zavatra olona mihintsy no tapaka tampoka ny herin’aratra. Ny tena olana aza dia tahaka ny tenako mpanamboatra volo, ny volon’olona voasasa tokony hiditra fanamboarana amin’izay, eo indrindra ny herin’aratra no tapaka dia miantona ny asa ary very ny volanay”, izay no nambaran’ireto mpivady mpanamboatra volo sy mpanao “soudure”; nomarihan’izy ireo fa “ny 1/3 ny vola tokony hiditra taminay izao no very noho ny herin’aratra tapakataka ity ihany no antony”. Manginy fotsy ny fananararaotan’ireo jiolahy amin’ny asa ratsiny indrindra ireo mpanendaka sy mpandrava vao maizina ny andro. Tsy ny olon-tsotra isan-tokantrano ihany no misedra ny fahatapahana fa hatramin’ny toeram-pitsaboana indrindra ny tsy miankina ihany koa, izay lasa mampiasa labozia amin’ny asa fitsaboana ataony nefa ankehitriny noho ny firongatry ny tazo vokatry ny viriosy ao Toamasina, dia betsaka ny mamonjy toeram-pitsaboana tsy miankina.
Ankilan’izay, ny hopitaly manaram-penitra hotokonana ny 19 janoary dia hireharehan’ny FAT sy ny minisiteran’ny fahasalamana, ny efa misy anefa tsy misy mpiraharaha sy fanampiana akory. Tahaka ny CSB II ao Ankirihiry izay efa volana desambra manontolo mitohy ny volana janoary no tsy misy herin’aratra ny toeram-pitsaboana. Nefa hatramin’izay mpitondra nifandimby dia ity CSB II Ankirihiry ity no isany toeram-piterahana sy fitsaboana zaza nomena lanjany noho izy manakaiky vahoaka, ary isany nahazoany fanampiana ara-pitaovana maro tamin’ireo fikambanana vahiny sy malagasy ary tetikasa Ambatovy ihany koa. Ankehitriny amin’ny fotoan’ny “manaram-penitra” izao, dia na ny herin’aratra ampiasain’ity toeram-pitsaboana ity aza tsy misy intsony, hany ka “eny an-tokontany izahay no mampiteraka noho tsy fisian’ny jiro ao anatin’ny efitrano fampiterahana, raha mahantoka labozia indray ny mpiteraka dia izay ampiasaina mampiteraka azy ireo, raha alina ny andro”, izay no nambaran’ireo mpampivelona miaina ao anatin’ny sarotra ao amin’ity CSB II Ankirihiry; vokany “mitatao ny loza ho an’ny mpiteraka isan’andro satria miaina ao anatin’ny haizina ny tera-bao, mijaly miteraka kosa noho ny haizina ny mpiteraka”, hoy hatrany ireto mpampivelona ireto.
Ankoatra izay, “tsy izahay no te-hanapatakana ny herin’aratra eto Toamasina fa ny fitaovana mihintsy no misy fahasimbana noho ny toetr’andro sy ny fahanterany ary ny tsy fahampian’ny vola entina hanaovana ny fikojakojana azy noho ny olana ara-bolan’ny jirama eran’ny nosy”, izay no nambaran’ny talem-paritry ny jirama Toamasina Raboto Thu Sion nanazava ny zava-misy ao Toamasina ankehitriny; nomarihany hatrany fa “efa nanao ezaka mafy izahay araka ny fitaovana sy ny vola eo am-pelan-tananay, nefa mbola tsy maharaka izany, izay no mbola mampisy ny herin’aratra kely mandeha izao na betsaka aza ny mimenomenona amin’ny fahatapahana lava mitranga isan’andro”. Raha ny mikasika ny olana eo anivon’ny CSB II Ankirihiry kosa, dia nambaran’Atoa Raboto Thu Sion fa “manana teti-bola tokony andoavana ny herin’aratra laniny ny CSB II ao Ankirihiry io araka ny teti-bolany miainga eo anivon’ny minisiteran’ny fahasalamana, nefa tsy voaloha izany ka toy ny rehetra ny CSB II raha tsy mahaloa herin’aratra dia tapahana ny herin’aratra ampiasainy”.
“Tsy izahay no ratsy fanahy fa ny minisiteran’ny fahasalamana no tsy ezaka nandoa ny trosany izay efa an-jatony tapitrisa ariary ny saran’ny ‘credits’ herin’aratra tsy voaloha. Nefa tsy misy zavatra tsy voavaha amin’ny fifampiresahana ihany koa”, hoy hatrany ity talen’ny jirama Toamasina ity namarana ny fanazavany.