Mbola mirongatra ny any Sakaraha

20/10/2012

Tsy misy fihenany hatramin’izao ny asan-dahalo any amin’iny distrikan’i Sakaraha iny, na eo aza ny fampandrian-tany izay atao amin’izao fotoana izao. Araka ny loharanom-baovao any an-toerana dia saika isan’andro no ahitana fanafihan-dahalo sy fifandonana eo amin’ny fokonolona sy ny dahalo any amin’izany distrika izany, toy izay niseho ny alakamisy teo tany Tanandava Efantsy, Kaomina Miary Taheza ao amin’ny distrikan’i Sakaraha. Dahalo roa no maty nandritra ny fifandonana. Mbola miaina ao anatin’ny tebiteby isan’andro isan’andro ny mponina any amin’ny distrikan’i Sakaraha

amin’izao fotoana izao, na dia eo azan y fisian’ireo mpitandro filaminana izay nalefan’ny fitondram-panjakana any amin’ny distrika tsy lavitra azy ireo mba hampandry tany nohon’ny asan-dahalo. Hatramin’izao dia mbola mitohy tsy anki-janona ny fanafihan-dahalo any amin’ireo tanana manodidina an’i Sakaraha.Toy ny mahazatra dia ny omby sy ny fananana lafo vidy hatrany no lasibatr’izany fanafihana izany.
Izany no niseho ny fiandohan’ity herinandro ity tany Tanandava Efantsy, Kaomina Miary Taheza ao amin’ny distrikan’i Sakaraha.Andian-dahalo, tsy fantatra ny isany, no nanafika tao amin’izany tanana izany. Nirongo basy mahery vaika izy ireo araka ny loharanom-baovao avy any an-toerana. Omby miisa 70 no lasan’izy ireo nandritra izany fanafihana izany. Naharitra andro maromaro ny fanarahan-dia nataon’ny fokonolona izay nampian’ireo miaramila ao amin’ny DAS any amin’izany faritra izany. Vokany ny alakalisy lasa teo vao nifanehitra tamin’ireo mpangalatra izy ireo ary nisy ny fifandonana teo amin’ny an-daniny sy ny an-kilany. Nahafatesana roa vokatr’izany fifandonana izany ireo dahalo, ary avotra kosa ary tafaverina tamin’ny tompony ireo omby nangalarin’izy ireo.
Marihina fa eo ho eo amin’ny 50 km tsy lavitra an’i Sakaraha no nitrangan’izany fanafihana niafara tamin’ny fifandonana izany. Izany hoe mbola mihaodohaody any amin’iny distrika iny hatramin’izao ireo dahalo. Araka ny loharanom-baovao ihany koa dia tsy ity kaomina ity ihany no isehoan’izany asan-dahalo izany fa saika ny disatrikan’i Sakaraha manontolo mihintsy. Mampametram-panontaniana ihany koa ny fahafantarana fa isaky ny misy fanafihana dia mitondra basy maherivaika hatrany ireo dahalo.
Tsy voafehy ny toerana
Tsara ny manamarika fa nisy ny tatitra nataon’ny zandarmariam-pirenena momba ny vokatry fampandrian-tany tamin’ny alalan’ny hetsika Tandroka izay atao any amin’ny faritra atsimo amin’izao fotoana izao. Izany tatitra izany no milaza fa hatramin’ny 1 oktobra no mankaty dia miisa 17 ireo dahalo matin’ireo miaramila any an-toerana. 30 kosa no voasambotra. Voalazan’ity tatitra natao omaly ity ihany koa fa ny karazambasy Kalachnikov sy ny Mas36 ary ny PA 7,66mm sy ny fusil de chasse no tena fampiasan’ny dahalo amin’ny fanafihana ataony. Omby miisa 2696 kosa no very tamin’ny volana septambra ka 73 no hita ka naverina tamin’ny tompony. Miisa 542 kosa ireo very tamin’ny volana oktobra ka 484 no hita sy naverina tamin’ny tompony. Misy omby miisa 270 kosa ireo giazana ao amin’ny zandary.
Ankoatr’izay dia nambaran’ny Kolonely Rasolofo Lumène, tompon’nandrikitry ny serasera sy ny fifandraisana ao amin’ny zandarmaria nasionaly fa mampanano sarotra ny asan’ireo mpitandro ny filaminana nalefa any amin’ireo faritra anjakan’ny asan-dahalo ny tsy fifehezan’izy ireo ny toerana, satria mbola mana-tombo amin’izany hatramin’izao ireo dahalo.