Very an-javony hatreto

11/01/2013

Efa-bolana katroka mialoha ny datin’ny fifidnana, roa volana katroka mialoha ny hamoahan’ny governemanta ny didim-panjakana miantso ny mpifidy, mbola tsy tafatsangana ihany ny Filan-kevitra Fampihavanana Malagasy. Araka ny re dia hivory amin’ity androany ity ny komity mpanara-maso momba ny fampiharana ny Tondrozotra izay nanankinan’ny Governemanta ny fananganana an’ity rafitry ny FFM ity taorian’ny tsy fankatoavana ny vokatry ny asan’ny CNOSC sy ny Ray amandreny Mijoro ary ny Finoana.Mbola hahatontosa ny asa tokony hataony ve ny Filankevitra fampihavanana Malagasy n any FFM raha toa ka tafatsangana soamantsara ihany? Io no fanontaniana apetraky ny rehetra amin’izao fotoana izao manoloana ny mbola tsy fitsanganan’ity rafitra ity.

Efa tany amin’ny volana mai tamin’ny taon-dasa no tapaka tao an’ivon’ny parlemantan’ny tetezamita ny volavolan-dàlana manangana izany rafitra izany izay isan’ireo nifaraharana tao anatin’ny Tondrozotra ihany koa ao amin’ny andininy faha 25 sy 26 ary 27. Raha tsiahivina dia ny Filankevitra fampihavanana Malagasy no isan’ireo rafitra na andrim-panjakana hanankinana ny famerenana ny filaminana sy ny fifanarahana ary ny fihavanam-pirenena eto amintsika.
Amin’izao efa-bolana mialoha ny fanatanterahana ny fifidianana izao, sy amin’izao roa volana sisa mialoha ny tokony hamoahan’ny Governemanta ny didim-panjakana miantso ny mpifidy izao anefa dia mbola tsy tafatsangana ihany ity andrim-panjakan’ny tetezamita ity. Tsiahivina fa efa nisy ihany ny dingana nataon’ny fiarahamonim-pirenena, nahitana ny CNOSC sy ny ray aman-dreny Mijoro ary ny Finoana tamin’ny fananganana izany rafitra izany. Efa nisy mihintsy aza ny anaran’olona izay navoakan’ny komity mpisafidy natsangan’ireo fiarahamonim-pirenena ireo izay handrafitra izany andrim-panjakana izany. Tsy nankatoavin’ny Governemanta anefa ny asa nataon’izany komity mpanangana ny FFM izany ka nankinina tamin’ny CSC na ny Komity mpanara-maso ny fampiharana ny tondrozotra ny raharaha. Hatramin’ny volana oktobra no nanankinana tamin’ny CSC izany asa izany. Raha ny fanazavana azo avy amin’ny loharanom-baovao dia hivory indray androany ny mpikambana ao amin’ny CSC , hamaritra ny dingana harahina amin’ny fandrafetana an’ity rafitra ity. Dingana izay mbola tsy azo vinavinaina hatreto ny amin’izay mety ho faharetany. Tsetsatsetsa tsy aritra no ilazana fa araka ny nambaran’ny mpikambana iray avy ao amin’ny CSC dia nohon’ny tsy fitovian-kevitra amin’ireo fiarahamonim-pirenena no mampitarozaka ny fandrafetana an’ity FFM ity.
Na izany na tsy izany raha ny fahateren’ny fotoana miohatra amin’ny asa miandry izany rafitra izany araka ny voalazan’ny tondrozotra sy ny làlana nolanian’ny parlemantan’ny Tetezamita dia sarotsarotra ihany ny hino fa hisy vokany azo antoka eto amin’ny firenena amin’ny fialana amin’ny krizy ny fitsanganan’ity rafitra FFM ity. Tsy isalasalana tokoa ny milaza fa hiasa am-pahamehana izany rafitra izany mialoha ny fanatanterahana ny fifidianana, raha toa ka mbola heverina fa ilaina ny fampihavanana mialoha an’izany fifidianana izany.